Una sa Balita

My Runaway Groom

By
0 469

Ika-16 na labas

Malalim na ang gabi pero mulat na mulat pa rin si Emilia. Nakatambay siya sa terrace nila at nakatanaw sa mga bituin.

Nilapitan siya ng ina.

“Anak, matulog ka na.”

Nilingon ni Emilia si Aling Milagrosa na naghihikab pa.

“Saglit na lang po ‘nay.”

Tiningnan ni Aling Milagrosa ang tinutumbok ng tingin ng anak.

“Binabantayan mo ba kung mababago ang pwesto ng mga bituin?”
Napangiti ang dalaga.

“Hindi naman po ‘nay, masarap lang po silang titigan, nakakagaan ng loob.”

“Bakit anak, may dinaramdam ka ba?”

“Wala naman po…naisip ko lang kung… paano kung…”

“Kung ano?”

Saglit na tiningnan ni Emilia ang ina, tinatantya kung sasabihin ba niya dito ang naiisip niya.

“Kung ano anak?”

“Kung…’nay, baka pagtawanan mo ko e, o kaya magalit ka?”

“Hindi, promise!”

“Talaga po?”

“Cross my heart.”

Muling tumanaw sa mga bituin ang dalaga.

“Paano po kung…isang araw magising na lang ako na…in love na pala ko?”
Bumilog ang bibig ni Aling Milagrosa.

“Kay Lito???”

Muling napangiti si Emilia.

“What if pa lang naman po ‘nay, hindi pa nangyayari.”

“Naku anak, kung maiinlababo ka sa lalaking ‘yon, okay na okay lang sa’kin, ang inaalala ko lang e baka masaktan ka lang, kasi mukhang bato ‘yon eh walang pakiramdam.”

“Sa tingin nyo po ba malabo na magustuhan niya ko?”

“Hindi naman sa ganon anak, sa ganda mong ‘yan at sa ugali mo, sigurado ako na magugustuhan ka niya.”

“Talaga po?”

“Uy, excited?”

“Si nanay talaga!”

Hinawakan ni Aling Milagrosa ang kamay ng anak.

“Basta tandaan mo lang, kapag nagmahal ka na, okay lang ang magbigay, okay lang na umunawa at okay lang din na masaktan, kasi lahat ‘yon parte ng pagmamahal, ‘wag mo lang kakalimutan na ang lahat ng bagay ay may limitasyon.”

“Opo ‘nay, tatandaan ko po ‘yan.”

“O pa’no hindi ka pa ba inaantok?”

“Konting oras na lang po, mauna na po kayong matulog.”

Iniwan na ni Aling Milagrosa ang anak.

Sa office.

Napansin ni Emilia ang pamumutla ni Lito.

“Sir, may sakit ka ba?”

Umiling ang binata habang patuloy sa ginagawa.

Hindi naman mapalagay si Emilia sa nakikita niya. Tinawagan niya ang company nurse.

Nagulat pa si Lito nang puntahan siya ng company nurse nila na si Yvette.

Related Posts

“Anong ginagawa mo dito?”

“Sir Lito, tinawagan po ako ni Emilia, i-check ko raw kayo.”

Kunot noong napatingin si Lit okay Emilia.

“Emilia, inaabala mo na naman ako!”

“Sir, mas maaabala kayo sa trabaho kung magkakasakit kayo.”

Walang nagawa ang binata kundi magpa-tsek sa nurse.

Kinuhanan siya nito ng bp at temperature.

“Parehong mataas sir, kailangan nyo muna pong magpahinga.”

“No thanks, but I’m fine. Sige na, bumalik ka na sa clinic.”

Wala ring nagawa ang nurse kundi sumunod sa mas nakakataas sa kanya.

Nilapitan ni Emilia si Lito.

“Sir kung ayaw mong magpahinga, uminom ka na lang ng gamot, ikukuha kita sa clinic.”

“Do what you want basta ‘wag mo akong abalahin.” Tugon ng binata na nanatili ang mga mata sa tinatrabaho sa computer.

Tinungo ni Emilia ang clinic at pagbalik nito ay dala na ang gamot. Walang kibo nitong iniabot kay Lito.

“Lapag mo na lang diyan.” Anang binata.

“Inumin mo na sir.”

“Later.”

“Ngayon na po.”

“I said later.”

Hindi na umimik si Emilia pero nanatili itong nakatayo sa tabi ng binata.

“Emilia, what do you think you’re doing?”

“Dito lang ako sir, hindi ako aalis sa tabi mo hangga’t hindi mo iniinom yang gamot.”
“You’re over reacting.” Inis na sabi ng binata.

Pero hindi pa rin natinag ang dalaga.

“Okay fine!” anas ng binata.

Napilitan din si Lito na inumin na ang gamot mawala lang sa harapan niya si Emilia.

“Thank you sir, back to work na po ako!”

Napapailing na lang si Lito sa OA na pag-aalala sa kanya nito.

Uwian. Hindi inaasahan ni Emilia na may makakakilala sa kanya. Nakasalubong niya sa lobby ng company si Don Julio na pinsan ni Don Roberto.

“Emilia!”

“D-Don Julio?”

“Ako nga, buti naman at natandaan mo ako?”

“Opo, kumusta po kayo?”

“Mabuti naman iha, ikaw kumusta ka? Mukhang naka-recover ka na sa pag-iwan sa’yo ni Lito sa altar!”

Nanlamig si Emilia. Nagtinginan sa kanya ang mga kapwa empleyadong nandoon at nakarinig sa pinag-uusapan nila partikular sina Olivia at Elmo na mga kaibigan na niya.

“O-opo…”

“Teka, ano nga palang ginagawa mo rito? Do you have any business here?”

“D-dito na po ako nagtatrabaho…”

“What, really?”

“Opo…”

“Ano naman ang work mo dito?”

“Assistant po…ni Sir Lito…”

“Oh, what a life, after ka niyang takbuhan sa kasal nyo now you’re working for him, for what Emilia?”

“Sir, may tamang lugar po para pag-usapan ito, mawalang galang na po pero mauna na po ako” pagkasabi no’n ay hiyang-hiyang naglakad ang dalaga palayo sa lahat. (Itutuloy)