Una sa Balita

Risa susunod kay Leila sa kulungan

By
0 4

Si Senador Risa Hontiveros na umano ang mala­mang na sumunod kay Senador Leila de Lima na nga­yon ay nakakulong dahil sa pagsalungat at lantarang pambabatikos kay Pangulong Rodrigo Duterte.

“Isa na namang halimbawa ng ‘Leilanization’ ng mga naghahayag laban sa kawalan ng katarungan sa mga gawain ng pamahalaan”, paglalarawan ni Dinagat Island Rep. Kaka Bag-ao sa anti-wiretapping case na isinampa ni Department of Justice (DOJ) Sec. ­Vitaliano Aguirre III laban kay Hontiveros.

“Matapos nilang ikulong si Senator Leila de Lima, ngayon naman si Senator Risa ang pinupuntirya nila,” dagdag pa ni Bag-ao na tulad ni Hontiveros ay parehong naging kinatawan ng Akbayan Party-list sa Mababang Kapulungan ng Kongreso.

Ang kasong isinampa ni Aguirre ay kaugnay ng ibinunyag ni Hontiveros na palitan ng text message umano nilang dalawa sa isang nagngangalang ‘Cong Jing’ kaugnay ng pinaplanong kaso laban sa senadora.