Una sa Balita

PRANGKAHAN: Pumipitik na ang mga Amerikano kay Duterte

By
0 3

Hindi alam ng Malacañang kung paano pagtakpan ang major, major kapalpakan na ginawa ng Pangulo tungkol sa ambassador ng Estados Unidos na si Phi­lip Goldberg at sa binigay na ayuda na $33 million.

Sabi ni Presidential Spokesman Ernesto Abella, hindi raw pampubliko ang sinabi ni Pa­ngulong Rodrigo Duterte na “bakla” at anak ng puta si Goldberg at “buang” ang mga Amerikano.

Sa harap ng mga sundalo sa Camp Lapu-Lapu sa Cebu City noong Agosto 5, at naka-broadcast live sa TV at radio, habang sinasabi niya na inaayos niya ang V. Luna Hospital, ang ospital ng military, pinasok niya ang pagbisita ni U.S. State Secretary John Kerry.

Ito ang sinabi ng Pangulo: “Kaya nga sabi ko nu’ng si Kerry, kasama kami ni Secretary, si Delfin (Lorenzana), kausap namin si (U.S. Secretary of State John) Kerry. Okay naman siya kasi, nag-away kami ng ambassador niya (Philip Goldberg). ‘Yung ambassador niyang bakla, P.I. buwisit ako diyan. Nakikisali doon sa election, giving statement. You’re not supposed to do that.”

Hanggang Oktubre pa si Goldberg dito sa Pilipinas.

Dagdag pa niya: “So, that (John) Kerry, nu’ng pumunta siya dito, nagkain kami. Iniwanan pa kami ni, si Delfin (Lorenzana) ng $33 million. Okay ito ah. Bastusin natin ulit para mag-areglo itong buang na ito. Pera pala ito. Pera-pera lang.”

Siyempre hindi natuwa ang mga Amerikano. Kung ang China noong ininsulto ni dating Pangulong Noynoy Aquino, inihambing ang ginagawa nila sa Spratlys sa ginawa ni Hitler ay hanggang salita lang na mahinahon, iba ang Amerikano.

Ipinatawag ng State Department ang chargé d’ affaires o ang opisyal na namamahala sa embassy habang wala ang ambassador (umuwi na  si ambassador to the U.S. Jose Cuisia at wala pang ina-appoint si Duterte) na si Patrick Chuasoto tungkol sa mga sinabi ni Duterte.

Related Posts

Sabi ni Abella, ipinaliwanag daw ni Chuasoto ang pagka­sabi ni Duterte.

Sabi ni Abella, hindi raw para sa publiko ang sinabi ng Pangulo tungkol kay Goldberg at kay Kerry. “It was addressed to a certain audience and the comments were confined to a certain audience,” sabi pa niya.

Hindi ko na tina-translate sa Tagalog ang sinabi ni Abella dahil hindi ko alam kung ano talaga ang ibig sabihin. Bahala na kayo umintindi.

Nagpalabas ang U.S. Embassy sa Manila noong Biyernes ng pahayag, ang $32 milyon na kanilang ayuda ay hindi bago na akala ni Duterte ay binigay bilang suyo sa kanya. Dati na raw naka-appropriate ‘yan at kasama ‘yan sa pinagpatuloy nila.

Ito, pumipitik na. Sinabi ng U.S. Embassy, ang pagbigay ng ayuda na ito ay nakatali sa record ng “human rights”, “due process” at “rule of law”.

Paano ‘yan, ‘yun ang mga salitang bwisit si Duterte?

***

Blog:www.ellentordesillas.com
E-mail:ellentordesillas@gmail.com