Una sa Balita

PH-Japan, palig-onon ang relasyon

By
0 94

Nagkasabot ang Pilipinas ug Japan nga lig-onon ang pagtinabangay sa nagkadaiyang aspeto sama sa ekonomiya, social security, infrastructure development, depensa ug seguridad lakip na ang pagbatok sa terorismo.

Kini human sa tigum sa miaging semana sa Tokyo nilang Foreign Affairs Secretary Alan Peter Cayetano ug sa iyang counterpart nga si Japanese Foreign Minister Taro Kono.

Matud sa Department of Foreign Affairs (DFA) nga lakip sa gituki sa duha ang mga isyu sa rehiyon sama sa West Philippine Sea (South China Sea) ug ang isyu sa Korean Peninsula.

Nagpasalamat si Cayetano sa kaandam sa Japan nga motabang sa Pilipinas ilabi na kun adunay kalamidad mitanyag usab ug tabang sa apektado sa linog Kansai Region niadtong Hunyo 18.

Samtang gipasalamatan usab sa Foreign Minister sa Japan ang pagpirma sa miaging bulan sa Memorandum of Cooperation o kasabutan nga nagtugot sa Japan nga kuhaon ang mga patay’ng lawas sa mga sundalong Hapon nga napatay dinhi sa Pilipinas niadtong World War II.