Una sa Balita

Perya at karnabal

By ,
0 130

Pamilyar na tayo dito lalo ngayong nalalapit na ang Kapaskuhan. Magbubukas na ang masasa­yang karnabal at perya sa kapuluan.

Pwede tayong maglaro, mamili, sumakay sa mga rides gaya ng ferris wheel, manood ng mga palabas na pangkarnabal, at iba pang natatangi sa loob ng bakuran ng perya at karnabal. At ngayong laganap ang teknolohiya, maaari na rin nating i-share ang ating karanasan sa madla sa pamamagitan ng mga larawan at video.

Wala namang ma­laking pagkakaiba ang perya at karnabal, ma­liban, marahil, na ang perya ay iyong mabilis na nagpapalipat-lipat sa bawat lugar na may sasapit na piyesta samantalang ang karnabal ay matagalan; taon, o sa kalagayan ng maraming karnabal sa bansa natin, dekada na.

Mula sa salitang Español na ‘feria’ ang perya. ‘Fair’ naman ito sa Ingles. Ibig sabihin, talagang may malalim nang tradisyon ng kasiyahan ang perya.

Natatandaan ko pa, noong bata ako sa Valenzuela at Obando, Bulacan, hinihintay-hintay ko ang pagsapit ng kapistahan tuwing Mayo. Makakapunta kasi ako sa mga perya. Maglalaro, magbi-bi­ngo, magsusugal, gagamit ng baril na de-­hangin. O kaya ay maghahagis ng barya sa mga kuwadra-kuwadradong mesa.

May palabas din sa perya. Iyong mga tipong ‘Ang Taong Alimasag’ o ‘Ang Sirena ng Atlantis’. Kailangang magbayad para makapasok para makita ang mga ‘kagila-gilalas’ na taong ito (na kadalasan ay may mga kapansanan lang naman talaga, at dinamitan ng kakaiba).

May malaking bahagi sa aking pagkatao ang perya kaya masaya akong nagbabalik-tanaw sa tuwing makakakita o pumapasok sa perya.

Samantala, kung ilalapat sa ating kultura, para namang mas sosyal ang karnabal. May mahal na entrance fee. Mas komplikado ang mga rides. Hindi lamang caterpillar at ferris wheel. Malawak ang karnabal, at kung pagbabatayan ang mga karnabal sa bansa natin, mas maaliwalas.

Kakaiba at komplikado ang tradisyon ng karnabal sa mundo. Alam ba ninyong ang etimolohiya—ang pinagmulang salita—ng karnabal ay ‘karne’?

Ang karnabal ay okasyong karaniwang ipinagdiriwang ng mga sinaunang Kristiyanong bansa bago ang lent o kuwaresma, ang apatnapung araw bago ang Pasko ng Pagkabuhay. Ito ang kasiyahan bago ang mahaba-habang pakikiisa sa pasyon ni Kristo na naglulundo tuwing Biyernes Santo.

Sinasabing nagsimula ang karnabal mula sa salitang Latin na ‘carne levare,’ na literal na ‘remove meat’ o ‘farewell meat’ o pagtatanggal ng karne na karaniwang ginagawa tuwing Kuwaresma ng tradisyong Katoliko.

Kaya ang karnabal ay katatampukan din ng kainan, kasiyahan, inuman. At pagkatapos nito, pananahimik, pagtitika, pakikiisa sa buhay ng Diyos.

Gayunman, patuloy na umiinog ang kahulugan ng dalawang salitang ‘karnabal’ at ‘perya’. Gaya halimbawa ng katatapos na filing ng certificate of candidacy (COC). Masaya, maingay, may mga talumpating paulit-ulit na nating narinig mula pa noong unang panahon.

Lahat ay nangangako ng pag-unlad, mayroon namang sadyang nag-file ng COC para makakuha ng ilang minutong katanyagan. May mga gimik para makatawag ng pansin. Pero alam naman na­ting pansamantala lang ang lahat. Hanggang sa muling pagdaraos ng karnabal at perya na kung tawagin ay kampanya sa halalan.

***

Para sa inyong mungkahi at puna, maaari kayong magpadala ng mensahe sa akin sa jwedelosreyes@yahoo.com o sundan ninyo ang aking Facebook account dito: https://www.facebook.com/joselito.d.delosreyes.