Abante Online
Abante is the leading Tagalog-language tabloid paper in the country.

Partisipasyon ng LGUs sa education sector palakasin

0 101

Bilang Chairman ng Senate Committee on Basic Education, Arts and Culture, mariing isinusulong ng inyong lingkod ang mas aktibong pakikilahok ng mga lokal na pamahalaan sa paghahatid at pag-angat sa kalidad ng edukasyon sa bansa.

Maraming mahahalagang papel ang ginampanan ng mga lokal na pamahalaan sa pagpapatuloy ng edukasyon sa gitna ng pandemya. Isa na rito ang mas agarang pagtugon nito sa pangangailangan ng mga guro at mag-aaral sa kanilang mga nasasakupan dahil mas malapit sila sa mga ito.

Bukod dito, malaking impluwensiya din ang susunod na Secretary of Education na si Vice President-elect Sara Duterte-Carpio ang mga lokal na pamahalaan upang maging mas aktibo ang mga ito sa usapin ng edukasyon. Dahil natanggap ng Vice President-elect ang boto ng mahigit 61 porsyento ng mga boto ng taumbayan, mayroon siyang political capital upang maipatupad ang mga kinakailangang reporma upang tugunan ang krisis sa sektor ng edukasyon.

Sa kakatapos lamang na 18th Congress, inihain ng inyong lingkod ang Senate Bill No. 1579 o ang 21st Century School Boards Act. Binibigyang mandato nito ang mga school boards na magpatupad ng kinakailangang reporma upang iangat ang kalidad ng edukasyon.

Ang tagumpay ng mga programang ito ay masusukat sa mga batayang tulad ng participation rate ng mga mag-aaral, bilang ng dropouts at out-of-school youth, achievement scores sa mga national tests, assessment tools, at iba pang standardized test scores. Gagawin ding batayan ang pagkakaroon ng mga child development centers at suporta sa special education at Alternative Learning System o ALS.

Ipinapanukala din natin ang pagpapalawig sa paggamit ng Special Education Fund o SEF upang magamit sa sahod ng mga guro sa pampublikong paaralan sa elementarya at high school, sahod ng mga guro at capital outlay sa preschool, pagpapatakbo ng mga programa sa ALS, at iba pa.

Nakita natin nitong panahon ng pandemya kung gaano kahalaga ang papel ng mga lokal na pamahalaan upang matiyak ang pagpapatuloy ng edukasyon, lalo na’t mas nauunawaan nila ang pangangailangan ng mga mag-aaral at mga guro sa kanilang mga nasasakupan. Sa pagpasok ng bagong administrasyon, kailangang palawigin din natin ang papel ng lokal na pamahalaan at gawin silang katuwang sa pag-angat sa kalidad ng edukasyon.

Leave A Reply

Your email address will not be published.