Abante Online
Abante is the leading Tagalog-language tabloid paper in the country.

Pa-ghost month na

0 288

Sa bisperas ng unang araw ng Setyembre, inaasahan na lalabas ang mang-aawit na si Jose Mari Chan upang muling magbigay ng hudyat na papasok na ang mga tinaguriang ‘ber’ months at nangangahulugan na umpisa ng sinasabing pinakamahabang selebrasyon ng pasko saanmang panig ng mundo. Muli nating maririnig ang kanyang magandang tinig sa kantang ‘Christmas in our hearts’ na nakatatak sa kanya. Para sa marami, ang panahong ito ay naka-ugnay sa pag-asa at kasayahan.

Nguni’t bago yan, mauuna muna ang tinatawag na “ghost month” na sumisimbulo ng rimarim at nagbabadya ng kamalasan. Ang buwan ng mga multo, ayon sa kultura ng mga Tsino ay isang panahon kung saan—ayon sa alamat—ang mga multo at mga espiritu ng mga pumanaw na mga ninuno ay lumalabas upang bumisita at makisalamuha sa atin. Karaniwang pumapatak ito sa buwan ng Agosto, ngunit ang petsa nito ay nagiiba-iba bawa’t taon. Ngayong 2021, ito ay sasapit sa Agosto 8 hanggang sa Setyembre 6.

Isang palatandaan ng paglaganap ng kulturang Tsino ay ang parami nang paraming mga Pinoy na hindi lamang nakakaalam ng tungkol dito bagkus ay sumasampalataya pa sa mga pamahiin na bumabalot sa paniniwalang ito. Sinasabi ng mga dalubahasa sa fengshui, makakaiwas naman sa mga kamalasan kung susundin ang ilang mga tagubilin, kagaya ng mga sumusunod.

Ang pinaka-kilalang payo na pangontra sa ghost month ay ang hindi pag-uumpisa ng isang bagay o aktibidad. Kabilang dito ay ang lagi nating naririnig na hindi dapat mag-umpisa ng anuman—negosyo, bahay, sasakyan, aktibidad, kontrata, at marami pang iba. Ito any paliwanag kung bakit para sa mga may balak magtayo ng mga gusali o bahay, iniiwasan simulan ang proyekto kapag nasa ghost month na. Maging pagdating sa relasyon, hindi magandang pangitain kapag ang petsa ng kasal ay nasa loob ng ghost month.

Inaabisuhan ang mga tao na maging higit na maingat sa panahon ng ghost month sa larangan ng kalusugan sapagka’t sinasabi na tumataas ang bilang ng mga nagkakasakit, naaksidente, at namamatay sa panahong ito. Sa buwan ng mga multo, kabilin-bilin din ng mga eksperto na ipagpapaliban din ng anumang operasyong pangkalusugan. Tiyak na tanong ng marami ay paano na lamang ang mga sitwasyon kung saan kailangan-kailangan na ang operasyon para maisalba ang buhay ng pasyente. Madaling maintindihan na ang sagot dito ay dapat ituloy ang kinakailangang operasyon sapagka’t parehong kamatayan ang iniiwasan dito.

Nangangahulugan ba na dapat huminto ang normal na pamumuhay natin sa panahong ito? Sa aking pakiwari, hindi ito ang mensahe ng paniniwalang ito. Sa tingin ko, ang puno’t dulo nito ay ang pag-iingat na kailanman ay hindi maaring maging masama—maging ghost month o anumang araw sa taon. Maging ang kulturang Tsino ay sagot sa mga maaring kamalasan na maidulot ng ghost month. May mga pangontra naman, kagaya ng asin, insenso at marami pang iba.

Mas higit tayong matakot sa kamalasan na maaring mag-umpisa sa Oktubre—sa pagsumite ng pagkakandidato para sa 2022. Ihanda na ang mga pangontra natin.

Leave A Reply

Your email address will not be published.