Una sa Balita

P1M nga kantidad sa party drugs nasakmit sa PDEA

By
0 47

Moabot sa P1 milyon nga kantidad sa ecstasy na posibleng ibaligya o ideliber sa mga bar ang nababagan sa mga tauhan sa Philippine Drug Enforcement Agency (PDEA) human masikop ang 38-anyos nga gituhuang ‘drug courier’ sa gihimong buy-bust operation sa Quezon City, kagahapon sa kadlawon.

Matud ni PDEA agent Wenifredo Alagabia sa Special Enforcement Agency, giila ang suspek nga si Carlo Santos, alyas Elmo, 38, ug nagpuyo sa ML Quezon St., Bagong Bayan, Taguig City.

Sa report sa PDEA, mga alas-2:20 sa kadlawon gihimo sa otoridad ang buy-bust operation batok sa suspek sa Mother Ignacia, Avenue, Quezon City, dihang nakumpirmar na ang pagpamaligya niini ug ecstasy, ug siyay ‘supplier’ sa ‘party drugs’ sa pipila ka disco houses ug night club sa Quezon City.

Nasakmit gikan sa suspek ang moabot sa 330 ka buok nga tableta ug 40 ka kapsula sa ecstacy, nga nagkantidad ug P777,000.00 ug siyam (9) ka botelya sa energy drink nga adunay sulod nga 1,100, ml nga liquid ecstacy nga nagkantidad ug P165,000.00 nga moabot sa P942,000.00 ang nasakmit nga ‘party drugs.’

Si Santos gitanggong karon sa PDEA detention cell ug nag-atubang sa kasong kalapasan sa Section 5 ug Section 11 sa RA 9165 o comprehensive dangerous drug act.