Una sa Balita

P.5B danyos sa Metro Ayala Center mall, sunog ‘under control’ na

By
0 1,201

Hindi bababa sa kalahating bilyong piso ang halaga ng nasira sa nangyaring halos dala­wang araw na sunog sa Metro Ayala Department Store sa Cebu na idineklarang ‘under control’ bandang alas-12:45 ng tanghali kahapon .

Ayon kay Bureau of Fire Protection (BFP) Regional Director Sr. Supt. Samuel ­Tadeo, bagama’t wala pa silang inisyal na imbes­tigasyon kung ano ang naging dahilan sa sunog ng nasabing mall, sinasabing malaki-laki ang naging pinsala ng sunog.

Ayon kay Tadeo, sa ngayon ay external firefighting ang kanilang ginagawa dahil na rin sa hindi makapasok sa loob ang mga bumbero.

Abante Hiring – IT dep

Kamakalawa ng gabi ay lumakas pa ang apoy sa fabric section ng mall at paliwanag ng opis­yal na lumiliyab na ito sa loob pero lumakas lang ito nang dahil na rin sa malakas na hangin.

Ganap na alas-nuwebe ng gabi noong Biyernes nang sumiklab ang apoy sa loob ng Metro Department Store sa Ayala Center, Cebu City pero kinumpirma naman na walang iniulat na namatay o nasaktan dahil nagkataon na sarado na ang mall nang sumiklab ang sunog.

Sa report ni Fire Supt. Ronbaldo Orbita, ground commander­ ng Bureau of Fire Portection-7, nahihirapan­ silang pasukin ang ­department store dahil zero visibility na ito sa kapal ng usok kaya binutasan na lamang ang konkretong dingding ng ikatlong palapag para madaanan ng kanilang fire hose.