Una sa Balita

OUT OF ORDER: Mga dating Oakwood mutineers ang nagpapatakbo ngayon ng BoC

By
0 6

Parang throwback sa 2003 Senate hearing sa Oakwood Mutiny ang ginawang pagdinig ng House Ways and Means committee na dapat sana ay tungkol sa proposed 2018 budget ng Bureau of Customs pero napokus sa kargamentong naglalaman ng P6.5 billion shabu na nakalusot sa Green Lane ng BOC.

Napanood ko ang live telecast ng Ways and Means committee hearing kung saan kabilang sa mga nagisa ng mga kongresista sina Customs Commissioner Nicanor Faeldon, Deputy Commissioner Gerardo Gambala at Director Milo Maes­trecampo ng Import Assessment Services (IAS) ng BOC.

Kabilang sina Faeldon, Gambala at Maestrecampo sa grupong Magdalo na nagsagawa ng armadong pag-aaklas sa Oakwood Hotel noong 2003 laban sa administrasyon ni Gng. Gloria Macapagal-Arroyo na noo’y kuwestiyonable ang pagkakaupo bilang pangulo matapos ang Edsa 2 na nagpatalsik kay Pangulong Joseph Estrada.

Pinakakilalang lider noon ng Magdalo si Navy Lt. Sg. Antonio Trillanes IV na naging spokesman ng Magdalo at hanggang sa Senate hearing noong 2003 ay siya rin ang pinakama­lakas ang boses sa mga dumalo na kinabilangan din nina Army Capt. Gambala at Maestrecampo.

Miyembro ng Philippine Military Academy Class of 1995 sina Trillanes, Maestrecampo at Gambala na siyang class valedictorian kung isa siya sa mga naging pasimuno ng Oakwood Mutiny na sinasabing pinondohan ng mga anti-Gloria. Non-PMAer si Faeldon na may ranggong kapitan sa Philippine Marines.

Hindi ko matandaan kung kasama si Faeldon sa 2003 Senate hearing pero ang sigurado ako ay nakatakas siya sa detensyon at noong mga panahon na siya ay nagtatago ay nakuha pa niyang pumasok sa loob ng Camp Crame at nagpakuha pa ng litrato sa harap ng general headquarters na hindi ikinatuwa noon ng Philippine National Police.

Kaya nga nang mapanood ko sina Gambala at Maestrecampo sa House Ways and Means committee ay sumagi sa isipan ko kung gaano katapang noon sumagot sa mga senador sina Gambala at Maestrecampo na noo’y nakadetine sa Fort Bonifacio kasama ang iba pang Oakwood mutineers mula sa Army.

Parehong nahatulan din ng pagkakulong ng mula 20-40 years sina Gambala at Maestrecampo noong 2008 matapos nilang baguhin ang kanilang not-guilty plea sa “Guilty” at ito ay nangyari matapos din na magbigay sila ng public apology kay Gng. Gloria Macapagal-Arroyo.

Ilang buwan pagkatapos ng kanilang conviction ng Makati Regional Trial Court ay binigyan ng GMA ng pardon sina Gambala, Maestrecampo at siyam na kasamahan nito sa Philippine Army.

Sa pagkakaalam ko ay dito nagsimula ang hidwaan sa pagitan ng grupo ni Trillanes sa Navy at kina Gambala at Maestrecampo ng Army dahil sa maagang pagsuko ng mga ito at pagtanggap ng pardon kay GMA.

Lalo pang lumalim ang kanilang away nang sumuporta sina Faeldon, Gambala at Maestrecampo kay Pangulong Rodrigo Duterte samantalang si Trillanes ay patuloy na bumanat dito.

Senador na noong 2007 si Trillanes pero nakakulong pa rin sa PNP Custodial Center (dahil naman sa Nov. 29, 2007 mutiny sa Manila Peninsula Hotel sa Makati Avenue) hanggang mabigyan siya ng unconditional pardon noong 2010 ng bagong upong si Pangulong Noynoy Aquino.

Kung dati-rati ay mga rebeldeng humarap sina Gambala at Maestrecampo sa Senado noong 2003, mga opisyal naman sila ng Bureau of Customs nang humarap sa mababang kapulungan noong Miyerkules at mula sa pagiging mga militante noong 2003 ay para silang mga basang sisiw naman habang ­sinasabon ng mga kongresista hinggil sa nakalusot na shabu ng nagkakahalaga ng P6.5 billion.

Mismong ang dati nilang abogado at ngayo’y Kabayan party-­list Rep. Harry Roque ang nalungkot na ang mga dating idealis­tang rebelde ng Magdalo ay hirap ngayong magpaliwanag kung bakit nakalusot sa Green Lane ang nasabing ilegal na droga.

Nilamon na nga kaya ng sistema sa BOC ang mga kagaya nina Faeldon, Gambala at Maestrecampo kung kaya hirap na hirap sila sa pagsagot sa mga tanong ng mga kongresista? Nakakalungkot talaga.