Una sa Balita

Nakaladkad sa gold smuggling: DOJ Asec Macarambon nag-resign

By
0 846

KINUMPIRMA ni Justice Secretary Menardo Guevarra na nagbitiw na sa tungkulin si Assistant Secretary Moslemen Macarambon matapos na pangalanan ni Pangulong Rodrigo Duterte dahil sa alegasyon ng korapsiyon.

Ang pagbibitiw ay ginawa ni Macarambon matapos na sabihan ni Pangulong Duterte na magbitiw at kung hindi, sila ay tatanggalin sa tungkulin.

Bukod kay Maca­rambon, pinagbibitiw na rin ni Pangulong Duterte si Assistant Secretary Tingagun Umpa ng Department of Public Works and Highways (DPWH).

Ang panawagan ay ginawa ni Pangulong Duterte kasunod ng imbestigasyon ng Presidential Anti-Corruption Commission (PACC).

Nabatid na si Maca­rambon ay namagitan umano sa ipinuslit na ginto at alahas sa Ninoy Aquino International Airport (NAIA) habang si Umpa ay nangomisyon umano sa mga contractor sa mga proyekto ng DPWH sa Autonomous Region in Muslim Min­danao (ARMM).

Samantala, sinabi ni Macarambon na gusto umano niyang makausap si Pangulong Duterte para linisin ang kanyang pa­ngalan at para makapagpaliwanag.