Una sa Balita

Meralco-MVP ‘sweetheart deal’ ipakalkal sa DOJ

By
0 2,550

Maglalabas ng pinal na report ang joint committee ng Kamara na magrerekomenda para aksiyonan ng Department of Justice (DOJ) at Office of the Ombudsman ang diumano’y ‘sweetheart deal’ ng Meralco sa mga sister company nito para sa pitong power supply agreements (PSA).

Ayon kay Surigao del Sur Rep. Johnny Pimentel, chairman ng House committee on good government and public accountability, irerekomenda nila na magsagawa nang mas malalim pang imbestigasyon ang DOJ at Ombudsman sa nasabing isyu.

Kasama rin anya sa ipasisiyasat ang papel ng mga komisyoner ng Energy Regulatory Commission (ERC) sa diumano’y ‘sweetheart deal’ ng Meralco na pag-aari ng binatang negosyante na si Manny V. Pangilinan.

Kahapon ay tinapos na ang joint meeting ng House committee on good government and public accoun­tability at House committee on energy sa House Resolution No. 566 ni Bayan Muna Party-list Rep. Carlos Isagani Zarate na kumukuwestiyon sa Meralco ‘sweetheart deal’ at House Resolution No. 1161 na inihain naman ni Minority Leader Danilo Suarez na nananawagang agarang resolbahin ang aplikasyon ng pitong PSA.

Kaugnay nito, sinabi ni Zarate na dapat ma­nagot ang mga komis­yoner ng ERC na nagpalusot sa mga sister company ng Meralco sa competitive selection process (CSP).

Batay sa napagkasunduan ng joint committee, ilalabas ang pinal na report matapos balangkasin ang mga pagbabago sa ‘fin­dings and conclusion’ ng isinagawang imbestigasyon.

“The draft report concludes, and rightfully so, that the ERC commissioners have committed malfeasance, misfeasance and nonfeasance, rendering illegal ERC’s issuance of Resolution No. 1, Series of 2016, that delayed the effectivity of the Competitive Selection Process. The draft report also concludes that ERC officials have committed acts prohibited under the Anti-Graft and Corrupt Practices Act, in implemen­ting the same Resolution No. 1,” ani Zarate. ­