Una sa Balita

Mayor Sara, Alvarez nagbati na

By
0 1,860

PLANTSADO na umano ang gusot sa pagitan nina Davao City Mayor Sara Duterte-Carpio at House Speaker Panta­leon Alvarez.

“Wala na po ‘yun, wala na po ‘yun. Naayos na po natin ‘yung gusot doon,” tugon ni Alvarez sa isang panayam sa telebisyon kahapon nang matanong tungkol sa naging iringan nila ni Mayor Sara.

Hindi na rin nagbigay ng reaksiyon si Alvarez nang usisain kung ano ang masasabi nito sa itinatag na regional political party ni Mayor Sara na Hugpong ng Pagbabago.

“Ayoko nang magkomento diyan, hindi naman siguro material at this time,” sabi ni Alvarez.

Matatandaan na nitong nakaraang buwan ng Marso ay hinamon ni Mayor Sara si Alvarez na magbitiw sa puwesto nito sa Mababang Kapulungan ng Kongreso kung totoong sumuko na ito sa kanilang ba­ngayan.

Nagsimula ang ba­ngayan nila dahil sa hirit ni Alvarez na kabilang sa oposisyon si Mayor Sara matapos na itatag nito ang Hugpong ng Pagbabago na wala umanong basbas ni Pangulong Duterte.

Binakbakan ni Ma­yor Sara si Alvarez dahil sa pahayag nito at tinawag pang ‘asshole’ ang lider ng Kamara.