Una sa Balita

Kumusta ka?

By
0 48

Mabuti naman? Ayos lang? Heto pa rin? Buhay pa? Sakto lang? Oks lang? K?

Dahil madalas na marinig hanggang naging pangkaraniwang pahayag na lang, madaling bale­walain ang pangungumusta.

O iyong pagtatanong ng “Kumusta ka?”

Buhat sa Español na “¿Cómo estás?” ang pahayag na “Kumusta ka?”

o sa Ingles, “How are you?” Inangkin na nating mga Filipino kung kaya sa katagalan, naging “Kumusta/Kamusta ka?” na naging “Musta?” o kung jejemon, “Muztah u?”

Paraan naman talaga ang pangungumusta para mabalikan ang hindi nalalaman sa isang tao, lalo na iyong hindi nakikita ng matagal na panahon.

Pero kalaunan, naging pangkaraniwang pleasantry na lamang, iyong halos wala nang halagang pananalita, ang pangungumusta.

Kasinghungkag ng ‘Hello’ kapag sinisimulan natin ang usapan sa telepono.

At dahil nga ­pleasantry, halos walang laman din ang sagot. Pleasantry rin: Mabuti naman. Ayos lang. Heto pa rin. Buhay pa. Sakto lang.

Oks lang. K.

Nasasayang ang magandang pagakataon na makapagbalitaan. Pwede naman kasing mas de­talyado ang pagtatanong.

Halimbawa, kung matagal nang hindi nakikita ang kababayan dahil umalis ka na sa dating tinitirhan, pwedeng “Kumusta na kayo du’n sa Valenzuela? Traffic pa rin ba?”

Hayan, mas magadang simula ng lehitimong pagbabalitaan. Sasagutin ito ng mas mahaba, mas detalyado, lalo kung gusto rin naman ng kakausapin ang makapagbalita.

Pero ibang usapan kung parehong walang interes ang nangungumusta sa kinukumusta.

Kaya hayun, ang pangungumusta ay nagsisimula sa “Uy, musta?” at natatapos sa “K lang.”

Tapos ang usapan.

Hindi sila nakatulong sa world peace.

Madalas naman kasi, hindi mahalaga ang salita.

Ang higit na mahalaga ay kung paano ito sinasabi.

Kung totoong pangungumusta ang hangad, asahan na bukod sa detalye ng nais kumustahin, may pagkagiliw sa pagbigkas.

Punong-puno ng sinseridad.

Kaya kapag sinagot ng “Ayos lang,” o “K lang,” ang detalyadong pangungumusta tulad nga ng “Kumusta na kayo du’n sa Valenzuela? Traffic pa rin ba?”

Asahan mong hindi masyadong gusto ng kinakausap ang usisain pa.

Pwede ring ayaw na niyang pag-usapan pa ang mahigpit na daloy ng trapiko, o ayaw lang niyang kausapin ka nang matagal.

Hindi ayos ang “Ayos lang.” Hindi okay ang “K lang.”

May ibang kahulugang hindi taglay ng salita. Ang tawag dito, non-verbal cues.

Mas mahalaga ang hindi sinasabi o ang paraan ng pagkakasabi kaysa sa mismong salitang sinabi.

Sa pag-aaral ng mga pantas sa pakikipagtalastasan (oo, pantas, ang salitang-ugat ng pamantasan, naks.

So kapag college graduate ka, pantas ka na, naks uli!), halos pitumpong porsyento ng interpersonal na komunikasyon ay hindi-berbal: kilos, tingin, galaw ng mukha, paraan ng paglakad, timbre ng boses, espasyo sa pagi-pagitan atbp.

Nawawalang halaga ang pangungumusta bilang pagsisimula ng usapan, o bilang pamukaw lang sa inip ng katahimikan sa pagitan ng mga sagot na “K lang.”

Para sa inyong mungkahi at puna, maaari kayong magpadala ng mensahe sa akin sa jwedelosreyes@yahoo.com o sundan ninyo ang aking Facebook account dito:

https://www.facebook.com/joselito.d.delosreyes