Una sa Balita

Kumakatawan

0 347

Noon pa mang nabighani ako sa kahulugan ng mga salita noong nasa kolehiyo ako sa Pamantasang Normal ng Pilipinas, lalo iyong salitang karaniwang ginagamit sa Filipino, manghang-mangha na ako sa salitang ‘katawan’.

Lalo kung nilalagyan ng mga panlapi o affixes kaya nagkakaroon ng ibang kahulugan.

Halimbawa ang salitang ‘kinatawan.’ Hindi na lamang ito ‘body’ sa Ingles. Ang ‘kinatawan’ ay representative. Sugo.

Bahagi ng katawan o body na sumisimbolo bilang isa. Halimbawa, iyong pagboto noong elementarya.

Taasan lang ng kamay. Ang bibilangin ay kamay pero isang tao ang katumbas, isang buong katawan. Halimbawa rin ang pagkakaroon ng class o grade representative.

Kapag mag-eeleksyon noong college, kinakatawan ng isang magwawaging kandidatong mag-aaral sa buong first year college, halimbawa, ang buong first year college.

Ibig sabihin, anuman ang sasabihin, pagtutol o pagsang-ayon ay siya na ring sasabihin, pagtutol o pagsang-ayon ng buong first year college na kinakatawan niya.

Mahirap nga namang kuhanin ang kabuuang desisyon sa tuwing mayroong dapat pagkasunduan, kaya kailangan ng kinatawan.

Ang kinatawan ang magsasalita para sa lahat, para sa katawan. Ang kinatawan ang consolidated na boses ng kaniyang kinakatawan.

Kaya ang tawag din sa Filipino sa inihalal na congressman ay kinatawan o representative.

Kinatawan ng kabuuang populasyon buhat sa isang partikular na lugar o distrito. Anumang sasabihin o gagawin ng kinatawan natin sa Kongreso ay pagsasatinig ng kung ano ang gusto nating ipabatid sa pamahalaan.

Kaya ang tawag sa Mababang Kapulungan ng Kongreso sa Batasang Pambansa ay House of Representatives. Naroon sa bulwagang iyon sa lungsod ng Quezon ang kinatawan ng ating distrito, iyong mula sa atin.

Naroon din sa Kongreso ang marami pang congressman na kumakatawan hindi naman buhat sa isang partikular na lugar o distrito kung hindi buhat sa sektor na gusto nating magkaroon ng tinig sa pagbalangkas ng batas.

Sectoral representatives o iyong tinatawag nating party-list representatives.

Hindi lugar o distrito kung hindi sektor. Magsasaka o manggagawa o kabataan, halimbawa.

Kung naniwala kang kakatawanin ng sektor na ito ang iyong minimithi, ibinoto mo ito noong nagdaang linggo. At nito ngang nagdaang mga araw, kung nagkamit ng sapat na bilang ng boto, ipinroklama.

Kung gayon, dalawa ang kumakatawan sa iyong congressman: isa mula sa distrito at isa mula sa sektor na kinabi­bilangan mo o gusto mong mabigyan ng representasyon. Iyon ay kung nagwagi ang ibinoto mong kakatawan sa iyo.

Tandaan, sa sistema ng pamamahala sa bansa, ang nakapangyayari ay ang tinig ng nakararami.

Kahit gaano kasidhi ang pagnanais mong katawanin ng iyong kandidato, kung hindi nanalo, hindi ka rin mapangangatawanan. Hindi ba? Ang ga­ling ng salitang ‘katawan’, ano?

Hindi nakapagtatakang sa katawan din galing ang salitang korporasyon. Literal na katawan din bagama’t mula sa lumang salitang Latin na corporare o pagsamahin sa isang katawan o corpus.

Kaya may salitang corpse at corps na binubuo ng maraming katawan. Iisa lang ang pinaggalingang salita maging ng korporasyon.

Makabuluhang isiping kung mali ang pagpili natin sa kinatawan natin, maaari tayong ituring na corpse o bangkay, o gamitin lamang bilang bahagi ng korporasyon ng congressman na ginagawang negosyo ang pagiging lingkod bayan.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy