Una sa Balita

Kaso ni Trillanes, na-raffle na sa Korte Suprema

0 1,107

Na-raffle na ang petisyon nga gisang-at ni Senador Antonio Trillanes IV nga mikuwestiyon sa pagbaliwala ni Presidente Duterte sa iyang amnestiya.

Ang kaso mitugpa ni Supreme Court Justice Diosdado Peralta.

Nasayran nga mihimo ang Korte Suprema ug special raffle subay sa urgent petition nga gisang-at ni Trillanes.

Gioaabot nga hatagan kinig prayoridad ang kaso nga gipangayo ni Trillanes nga mopagawas ug temporary restraining order batok sa pagpatuman sa Proclamation Number 572.

Gipangayo usab sa senador nga ideklarar sa Labaw’ng Hukmanan nga ‘null and void ab initio’ ang Proclamation No. 572.

Gipanganlang respondent sa petisyon silang Executive Secretary Salvador Medialdea, Defense Secretary Delfin Lorenzana, DILG Secretary Eduardo Ano, Justice Secretary Menardo Guevarra, AFP Chief of Staff Gen. Carlito Galvez Jr ug PNP Chief Director General Oscar Albayalde.

Gipasabot ni Trillanes, nga adunay nahitabong pagpanglupig ang Presidente sa iyang gipagawas nga kuwestiyonableng proklamasyon ug gimandu ang pagpasikop kaniya bisan wala kini arrest warrant.

Matud niya nga unconstitutional ang Proclamation No. 572 tungod kay nalapas niini ang ‘shared power’ sa presidente ug sa Kongreso.

Klaro nga usa ka political harassment ang tinguha sa proklamasyon, ug nalapas ang katungod ni Trillanes sa due process ug equal protection nga gigaranteya sa Konstitusyon. (jess campos)