Una sa Balita

Kamara babalasahin ni Gloria

By
0 1,356

TATALAKAYIN ng Kamara ngayong Lunes ang pagpapalit ng ilang opisyal sa kapulungan kasunod ng pagkakaluklok sa puwesto ni Speaker Gloria Macapagal-Arroyo.

Malamang na ma­pag-usapan din umano ang gusot kung sino ang dapat maging pinuno ng minorya sa Kamara.

“Sa Lunes (nga­yong araw) po natin malalaman. Nagpupulong-pulong pa po at mayroon pang isang meeting kung sino-sino ang mga papalitan ‘di lang ‘yan pati ‘yung mga staff and officials… palagay ko magkakaroon ng panibagong Secretary General at Sergeant-at-Arms,” pahayag ni Deputy Speaker at Camarines Sur Rep. Rolando Andaya sa isang pana­yam kahapon.

Tinutukoy nito na malamamg na mapalitan ay sina House Secretary General Cesar Strait Pareja at House Sergeant-at-Arms (retired) Lt. Gen. Roland Detabali.

Matunog na si Andaya ang napipisil na maging susunod na House majority leader. Bukod kay Andaya, kinokonsidera rin na maging majority leader si Deputy Speaker at Capiz Rep. Fredenil Castro.
Samantala, binanggit ni Andaya na posibleng mapalitan din ang chairman ng ilang komite.

Posibleng kasama sa papalitan ay ang mga kaalyado ni da­ting Speaker Pantaleon Alvarez na sina Oriental Mindoro Rep. Reynaldo Umali, chairman ng House committee on justice, at Surigao del Sur Rep. Johnny Pimentel na pinuno ng House committee on good government and public accountability.