Italyanong pedopilya dinampot sa Davao City

INARESTO ng Bureau of Immigration (BI) ang isang Italian national na inakusahang pedopilya at nanga­ngalap ng menor de edad na Pilipino.

Sa ulat na ipinarating kay BI Commissioner Jaime Morente, ang 57-anyos na dayuhan na kinilalang si Lorenzo Marchesi ay nahuli noong Nobyembre 8 sa Davao International Airport.

Paalis na sana si Marchesi nang harangin ito sa naturang paliparan dahil sa isang mission order para sa kanyang pag-aresto.

Si Marchesi ay kasalukuyang nakakulong sa hol­ding facility ng BI district office sa Davao City habang sumasailalim sa deportation proceedings at nakabinbin na resolusyon ng mga kasong kriminal na isinampa laban sa kanya ng kanyang mga naging biktima.

Unang binabaan ni Morente ng mission order si Marchesi dahil sa mga imoral na aktibidad ng huli upang ito ay maging undesirable alien.

Sinampahan din ng reklamo si Marchesi na nag-ugat sa paglabag nito sa Anti-Trafficking Act, Cybercrime Law, at Anti-Child Abuse Act. (Mina Aquino)