Una sa Balita

Hurado

0 603

Muli na namang naanyayahan ang inyong lingkod para maging hurado sa patimpalak sa pagsulat. Lagi na, sa mga ganitong pagkakataon, pinipili at sinusuri kong mabuti ang mga lahok.

Natutuwa akong makabasa ng magaga­ling sa wika, pamamahayag, talino, at iyong may sariwang pananaw hinggil sa mga bagay-bagay kapag mga ganitong kompetisyon.

Ang tinutukoy kong patimpalak ay ang Regional Higher Education Press Conference ng Rehiyon 4-A na ginanap sa lungsod ng Lucena sa lalawigan ng Quezon na ginanap nitong Enero 9-11 sa pangunguna ng Association of Tertiary Press Advisers of Souther Tagalog, Inc. na pinamumunuan ni Dr. Cynthia Q. Manalo.

Taon-taon, nagsasama ang humigit kumulang limandaang kabataang mag-aaral sa kolehiyo ng Katimugang Luzon para makipagtagisan ng ga­ling sa pamamahayag at pagsusulat.

Ang mga kabataang ito ay pawang kabilang sa kani-kanilang publikasyon sa kolehiyo at unibersidad na nais subukan ang kanilang galing kung ihahahambing sa ibang mag-aaral. Dahil ano ba? Hindi ba’t ang kompetisyon ay paghahambing naman talaga sa kakayahan ng bawat isa?

Naatasan ang inyong lingkod na maging hurado sa pagsulat ng tula, artikulo sa isports, at lathalain o features sa parehong Ingles at Filipino. Ang unang limang nagkamit ng puwesto ay lalaban naman bilang kinatawan ng Rehiyon 4-A sa Luzonwide Higher Education Press Conference kung kailan magtatagisan naman ang pinakamagagaling na mag-aaral ng bawat rehiyon sa Luzon. Gaganapin naman ito sa Marso sa Pampanga.

Sa ilang taon ng pagiging hurado ko sa taunang kompetisyon na ito, nakatutuwang sabihin na marami sa nagsipagwagi ay na­ging magagaling na manunulat. May mga nagkamit pa ng premyo sa Palanca, may nalathala sa malalaking pahayagan, hinahangaan nang spoken word artist, at iba pang kahalintulad na karera sa pamamahayag at pagsulat.

Pinangunahan ng mag-aaral na si Marjun Rayos mula sa Bata­ngas State University ang pagsulat ng tula sa Filipino. Sa Ingles, namayagpag ang galing ni Vanesa Mae Antony mula naman sa Laguna State Polytechnic University-Sta. Cruz campus.

Sa larangan ng pamamahayag sa isports sa Filipino, umangat ang obra ni Ken Alvarez buhat sa Southern Luzon State University-Tiaong campus. Sa Ingles, sinungkit ni Nelson Llanes ng University of Batangas-Lipa campus ang unang gantimpala.

Itinanghal namang pinakamagaling ang lathalaing Ingles na isinulat ni Jerome Grabriel Aguilar buhat sa University of Perpetual Help-Molino. Sa lathalain sa Filipino, kinuha ni Venedict Miguel ng Lyceum of the Philippines University-Batangas ang unang gantimpala.

Kasama sila sa ­de­legasyon ng Region-4A na sasabak sa Pampanga laban sa anim na iba pang rehiyon ng Luzon.

Napag-uusapan na rin lang ang maging hurado, buhat ang salitang ito sa Español na ‘jurado’ o jury sa Ingles. Sila ang mga nanumpang hahatol sa kawastuhan at katotohanan ng isang pakikipagtalo o diskurso. Etimolohiya naman ng salita ang ‘jurata’ sa Latin na nangangahulugang manumpa.

Kung kaya may kursong Juris Doctor na nangangahulugan ng pagpapakadalubhasa sa paghahanap ng katotohanan. Kaya naman, sa totoo lang, hindi madaling maging hurado. Dapat ay patas at walang pagkiling maliban sa katotoha­nan o, gaya ng sa timpalak na hurado ako, kagalingan.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy