Una sa Balita

This guy is mine

By
0 504

Ika-10 na labas

“E ikaw, wala ka bang balak na makigulo sa kanila?”

Abante Hiring – IT dep

“No need. Makaka-attend pa rin naman ako kahit wala akong partner.”

“Hay naku, kung katrabaho n’yo lang ako sigu­radong makikipag-agawan din ako sa dalawang ‘yon para maka-date si Justin!” natatawang sabi ni Vanessa.

“Ano ba ang nakita n’yo kay Justin at nahuhumaling kayo sa kanya?”

“Makahumaling naman ‘to, gusto lang.”

“So, ano nga?”

“Ewan ko, siguro kasi guwapo siya, mabait, mukhang masarap maging boyfriend!” kinikilig na tugon ni Vane.

Napangiti si Lanie.

Maya-maya pa ay lulugo-lugong magkasabay na pumasok sa loob ng boarding house sina ­Bhing at Julie.

“O, ba’t ganyan mga mukha n’yo?” tanong ni Red.

“E pa’no naman kasi ang tagal-tagal na naming nakatambay sa gate hindi pa rin dumarating si Justin!” reklamo ni Bhing.

“Baka naman nasa loob na.” si Mayla.

“Wala pa ‘yung kotse niya, kaya siguradong wala pa siya.” Si Julie.

“Naku baka naman nakipag-date pa ‘yon after work kaya wala pa.” Malungkot na sabi ni Mhae.

“HEH!” sabay na singhal nina Julie at Bhing.

Umaga. Napansin ni Red ang katamlayan ni Mayla. Iniwan niya saglit ang pinipritong tilapia at nilapitan ito na nakapangalumbaba sa mesa.

“Mayla, may sakit ka ba?”

Umiling lang ito.

“E bakit ang tamlay-tamlay mo?”

“Kasi naman Sis Red… ‘yung groom to be ko… ang aga magloko…”

“Ha? Bakit, pa’no mo nasabi?”

Ipinakita ni Mayla ang cellphone. Inayos pa ni Red ang salamin niya sa mata at saka pinakatitigan ang picture.

“O, may kasamang babae, at nakaakbay pa?”

“O ‘di ba? Nakakatamlay…”

“Teka, baka naman sister niya to or a friend?”

“Ewan ko, iba kasi ang kutob ko eh…”

“Ako rin kinukutuban eh…” suminghot-singhot si Red.

At…

“Sabi ko na nga ba, tama ang kutob ko, nasusunog na ang piniprito ko!” pagkasabi niyon ay dali-daling tumakbo pabalik ng kusina si Red.

Si Lanie naman ang lumapit kay Mayla.

“Mayla, narinig ko lahat ang sinabi mo…”

Malungkot lang na tiningnan ni Mayla si Lanie.

“Alam mo kasi hindi maso-solve ang problema mo kung iisipin mo lang tapos wala ka namang gagawin…”

“Ano naman ang gagawin ko?”

“Bakit ‘di mo siya tanungin tungkol sa picture?”

“Kokomprontahin ko siya?”

“Hindi naman sa kompronta, tanong lang. Kasi hindi naman niya ‘yon ipo-post kung gf niya ‘yun ‘di ba, kasi alam naman niyang makikita mo…”

“Oo nga, pero ang sweet-sweet nila oh,”

Related Posts

Pinakita pa ni Mayla kay Lanie ang picture.

“Ang sweet nga, pero kami ng pinsan ko ganito rin kami mag-pose sa picture eh, close kasi kami.”

“Ganun ba?…”

“Ang hirap talaga ng LDR ‘no? Pero kung nagmamahalan talaga kayo, keri nyo ‘yan hanggang sa dumating na ‘yung time na p’wede na kayong magkasama…”

“Salamat Lanie, kahit paano nabawasan ‘yung dinadala ko, sige d’yan ka na muna, tatawagan ko lang siya.”

“Okay, o baka makalimutan mong may pasok ka ngayon ha, maghihintay ang mga estudyante mo!” habol na paalala pa ni Lanie.

Napatingin si Lanie sa bintana at nakita nitong kalalabas lang ng pintuan ni Justin. Lumabas siya ng boarding house at pinuntahan ito.

“Justin!”

“Hey Lanie, good morning!”

“Good morning din. May sasabihin lang sana ko, itatanong actually kung p’wede?”

“About what?”

“K-kung available ka sa Saturday night, 6pm onwards?”

“Yeah, why?”

“Good. Kasi iimbitahan ka sana namin na sumama sa party ng company namin but…”

“But?”

“Kung okay lang sa’yo maging date nina Bhing at Julie for that night?”

“Date?”

“Oo, date… kasi wala silang makuha so ikaw ‘yung naisip nila.”

“E ikaw, may ka-date ka na ba?”

“Ahm, wala pa pero p’wede namang wala, gusto lang nilang meron.”

“So, p’wede ba ‘yon na pareho ko silang ka-date?”

“Ahm, p’wede naman siguro.”

“Okay. Payag na’ko.”

“T-talaga?”

“Talagang-talaga.”

“Okay, thank you ha!” Gustung-gustong yakapin ni Lanie si Justin dahil sa pagpayag nito pero pinigilan niya ang sarili.

“Sige Justin, pasok na’ko sa loob ha.”

“Okay.”

Hinatid na lang ni Justin ng tanaw ang dalaga habang papasok ito sa boarding house.

Sakay ng taxi papasok sa opisina ay masayang ibinalita ni Lanie sa mga kaibigan ang pagpayag ni Justin na maging date nila sa party.

“Really?” Hindi makapaniwalang tanong ni Julie na siya niyang katabi sa backseat.

“Teka, bakit date naming dalawa, ‘di ba dapat isa lang sa’min?” Tanong naman ni Bhing.

“E kasi mga sisterets, para walang away hating kapatid ‘di ba, p’wede naman ‘yon eh.”
Parehong napalitan ng lungkot ang mukha ng dalawa.

“Ay hindi masaya, so dalawa kaming nakaabrisyete sa kanya…” reklamo ni Bhing.

“Sandali nga, bakit ba inunahan mo kami sa pagsasabi sa kanya, Lanie?

Gusto mo lang siguro siya makita at makausap kaya pinuntahan mo siya ‘no?” Hinala ni Julie.

“Hoy grabe ka naman sa’kin, ginawan na nga kayo ng pabor… kasi kaninang umaga natanaw ko siya sa bintana na palabas do’n sa apartment niya, e naisip ko lang naman na tanungin na siya kaysa naman mag-aabang na naman kayo sa gabi sa gate natin, mukha kayong mga ewan.”

“A gano’n? So kailangan pa pala naming magpasalamat sa’yo?” Nakaismid na sabi ni Julie.
“No need. Basta ‘wag nyo lang ako awayin ngayon okay?”

Mula sa tagiliran ay niyakap ni Julie si Lanie.

“Sige na nga, effort appreciated!” Nakangiting sabi nito. (Itutuloy)