Una sa Balita

Espiya ng bayan

0 187

Maganda ang diskarte ng Philippine National Police (PNP) na gamitin ang mga mamamayan sa pagpapanatili ng kaayusan sa mga komunidad lalo na ang paglaban sa krimen at iligal na droga.

Kaya naman ang PNP-Calabarzon na binunuo ng mga lalawigan ng Cavite, Laguna, Batangas, Rizal at Quezon ay naglunsad ng tinatawag na ‘Community Mobilization Project’ o CMP na ang pangunahing misyon ay mangalap ng mga impormasyon laban sa mga kaaway ng sambayanan.

Ang kahalagahan ng tinatawag na ‘human intelligence’ ay hindi matatawaran dahil ang impormasyon ay direktang nagmumula sa mga tao.

Sa tamang pagtugon at paglalagom sa mga makukuhang impormasyon, ang mga awtoridad ay agad makaka-kilos laban sa anumang banta sa seguridad at katahimikan ng mga komunidad.

Ang ligtas na komunidad ay hangad ng lahat. Hindi na mag-aalala ang mga magulang sa kaligtasan ng mga anak sa mga gumagalang kriminal.

Nakamasid ang buong bayan. Agad magsusumbong sa mga pulis. (Umaksiyon naman kaya agad ang mga pulis?)

Ang proyekto ng PNP-Calabarzon ay gustong ipatupad ng liderato ng PNP sa buong bansa.

Sa Calabarzon kung saan nagsimula ang ‘Community Mobilization Project’, ang PNP ay nagtatag ng mahigit sa 200 ‘cluster’. Ang bawat ‘cluster’ sa bawat barangay ay binubuo ng 10 hangang 20 pamilya.

Boluntaryo ang serbisyo ng mga kasapi sa ‘cluster’. Hindi rin armado. Ang trabaho lamang kumuha ng impormasyon laban sa mga suspek sa iligal na droga at mga kriminal. Hindi rin ligtas sa mata ng CMP ang mga rebeldeng komunista at mga taga suporta.

***

Ang pagtutulungan ng mga awtoridad at komunidad ay napakahalaga lalo na sa usapin ng paglaban sa kriminalidad.

Subalit sa planong ito ng PNP na gawing ‘espiya’ ang mga tao laban sa sindikatong-kriminal, hindi kaya ipinain lamang ang mga sibilyan sa kalaban?
Una sa lahat trabaho ng mga pulis na protektahan ang mga tao laban sa mga salot sa lipunan.

Sa bawat impormasyon mula sa mga miyembro ng ‘cluster’ laban sa sindikato, agad naman kayang maproteksiyonan ng mga pulis ang mga tao kapag binalikan ng mga kriminal?

Kung sa mga lungsod at mauunlad ng lugar ay kuwestiyonable na ang ‘response time’ ng mga alagad ng batas, paano pa doon sa mga malalayong lugar?
Nagtatanong lang.