Una sa Balita

Balikatin natin

0 386

Synecdoche o ang pagpapalit-saklaw ang tawag sa figu­re of speech na hinggil sa isang bahagi para katawanin ang kabuuan. Halimbawa, hindi ko na gustong makita kahit ang anino mo sa lugar na ito. Na ang ibig sabihin talaga, hindi na gustong makita ang may-ari ng anino. Hindi lang basta ang anino.

Ilan pang halimbawa ng bahagi ng katawan ang kamay o ulo bilang representasyon sa kabuuan ng tao. Kaya nga kapag may botohan sa klase, halimbawa, karaniwan ay nagtataasan ng kamay bilang tanda na bumoboto sila sa ­kandidato.

Sa ganitong diskurso at dahil napapanahon kaya ito ang pamagat ng ating kolum: ‘Balikatin natin’.

Mahalagang bahagi kasi ng katawan natin ang balikat. Kung sa lite­ral na antas, siyempre, hindi tayo mabubuhay kung wala ang balikat. Samantala, kung patayutay o sa pagpapalit-saklaw o synechdoche sa Ingles, lalong maraming kahulugan ang balikat hindi lamang bilang ­katawan ng tao.

Sa Ingles, ­pupuwede mong sabihin sa ­paraang synecdoche, na ‘shoulder to lean on’ ka. O puwede ring shoulder to cry on. Ibig sabihin, kaibigan kang maasahan lalo sa mga bahagi ng buhay na malungkot ka at kaila­ngan ng makakausap o mahihingahan ng sama ng loob hanggang sa umiyak na nga. Kahit hindi mismo umiyak sa balikat, shoulder to cry on ka pa rin.

Pupuwedeng gamitin ang balikat mo bilang sandigan sa mga pagkakataong kailangang umiyak o magpahinga, o para kapitan para hindi matumba. Pero kung ito ay palatandaan ng masasandigan, puwede rin naman mabaliktad tulad ng sinasabi na­ting ‘nag-kibit-balikat’ o iyong akto na parang pagsasawalang-bahala, o hindi pakikialam, o kawalang-kaalaman.

Ipinagkibit-balikat ang problema. Hindi hinarap, o hinayaan na lang na makapaminsala. Pero hindi ang negatibong konotasyon ng salitang ‘balikat’ ang nais kong talakayin ngayon. Dahil sa panahong ito, kaila­ngan natin ang ­maraming ­balikat. Kailangang balikatin—sa literal ay pasanin, buhatin­ gamit ang balikat—ang mga kinakaharap nating pagsubok. Lalo ang mga apektado ng pagputok ng Bulkang Taal.

Maraming pasaning problema ang nasalanta nang pagputok ng bulkan. Hindi biiro ang manirahan sa evacuation site nang walang kasiguraduhan kung kailan uuwi, o kung may uuwian pang bahay. Bigla, noong nagdaang Linggo, nagbago ang kanilang pamumuhay. Mahaba-habang panahon bago bumalik sa normal na buhay ang mga nasalanta. ­Maaaring hindi na ang iba. At sa mga pasa­ning ito dapat tayong tumulong sa pagbalikat.

Kailangan nating balikatin ang kanilang problema para kahit papaano ay gumaan. Makikipasan tayo tulad ng nakasanayan ng ating mga ninuno, pinapasan nang sama-sama ang isang bahay. Balikatan. Bayanihan.

Napakarami nating magagawa. Maraming ahensya at institusyon ang tumatanggap ng tulong para maihatid sa Batangas. Hindi mo na kailangang pumunta sa Batangas kung sa malayo ka nakatira. Kailangan lang ay maipadala mo ang iyong ibibigay na tulong, mga karaniwan at batayang pangangaila­ngan ng isang pamilya. Pupuwede rin namang pera upang ang pinagkakatiwalaan mong institusyon na ang bahala sa pagbili sa pangangaila­ngan. At oo, samahan din natin ng dasal.

***

Para sa inyong mungkahi at puna, maaari kayong magpadala ng mensahe sa akin sa jwedelosreyes@yahoo.com o sundan ninyo ang aking Facebook account dito: https://www.facebook.com/joselito.d.delosreyes.

This website uses cookies to improve your experience. We'll assume you're ok with this, but you can opt-out if you wish. Accept Read More