Una sa Balita

Bagyong ‘Isang’ tinatarget ang Hilagang Luzon

By
0 6

Lalo pang lumakas ang bagyong ‘Isang’ habang binabaybay ang extreme Northern Luzon o dulong hilagang Luzon sa bilis na 15 kilometers per hour.

Sa Severe Weather Bulletin #8 na inilabas ng Philippine Atmospheric Geophysical and Astronomical Services Administration (PAGASA) kaninang alas-5:00 ng hapon, ang mata ng bagyo ay nasa 170 kilometro sa silangan ng Basco, Batanes.

Kumikilos ito sa direksyon ng Kanluran Hilagang-Kanluran at may lawak na 400 kilometro ang mahahagip ng pag-ulan.

Taglay ng bagyo ang lakas ng hangin na aabot sa 80 kph malapit sa gitna at pagbugsong 97 kilometro kada oras.

Nakataas pa rin ang public storm warning signal number 2 sa Batanes Group of Islands at signal number 1 naman sa Babuyan Group of Islands.

Pinalalakas ng bagyong Isang ang Habagat na nagdudulot ng pag-ulan sa malaking bahagi ng bansa.

Maliban sa Hilagang Luzon, magiging maulan din dahil sa habagat ang Metro Manila, Ilocos, Central Luzon, CALABARZON, MIMAROPA, Bicol, at Visayas.