Una sa Balita

Alaga ka ng PhilHealth: PhilHealth, ipinagtibay ang laban sa Health Insurance fund

By
0 24

Bilang tagapamahala ng National Health Insurance Fund (NHIF), ang PhilHealth ay may responsibilidad na siguraduhing ang paggamit ng pondong ito ay naaayon sa itinakda ng batas hinggil sa pampublikong pondo (public funds). Ito ang isinasaad ng Section 26 ng RA 10606 o ng National Health Insurance Act of 2013.

Kung kaya’t kami ay patuloy na nagsisikap at naghahanap ng mga paraan upang maiparating sa aming mga miyembro ang mga impormasyon patungkol sa PhilHealth. 

Patuloy kaming nakikipag-ugnayan at nakikipagtulungan sa aming mga partner institutions upang matiyak na ang lahat ng mga bagong polisiya, alituntunin, at patakaran ay patuloy na maipatutupad. 

Kami rin ay patuloy na nagsasagawa ng mga information campaign gamit ang quad media upang matiyak din na ang lahat ng mga pagbabago lalo na sa benepisyo ay aming maipararating sa aming mga miyembro.

Hindi maikakaila na ang fraud o mga tiwaling gawi ay nananatiling isang isyu sa anumang health insu­rance entity.

Kung inyong matatandaan, kailan lamang ay nagkaroon ng scam hinggil sa operasyon sa katarata kung saan nasangkot ang dalawang eye clinics sa ating bansa.

Lumabas sa imbestigasyon na inirerekomenda ng mga doktor ng nasabing eye clinics na sumailalim sa cataract surgery ang pasyente kahit hindi kinakailangan upang makakubra sa PhilHealth.

Bukod dito, may mga iba pang tiwaling gawi na ginagawa ang ilan sa mga accredited health care providers tulad ng ghost claims, padding ng claims o kaya ay pagdedeklara ng final diagnosis na kakaiba kaysa sa totoong kaso.

Dahil dito, ang PhilHealth ay gumagawa ng mga hakbang upang labanan ang mga bantang ito. Una na rito ang pagsasagawa ng Regional Multi-Sectoral Anti-Fraud Awareness Forum upang maipabatid sa ating mga partners ang kahalagahan ng anti-fraud program nang masiguro ang patuloy na pagbibigay ng de-kalidad na serbisyo sa ating mga miyembro.

Gayundin ang patuloy na orientation sa iba’t ibang government agencies, non-government organizations, medical associations, at accredited collecting partners sa iba’t ibang rehiyon upang maipaliwanag din na ang pangangasiwa ng NHIP fund ay hindi lamang responsibilidad ng PhilHealth kundi ng lahat ng may kaugnayan dito.

Nagtatag din kami ng “OplanKisapmata” task force na siyang nagba-validate ng claims sa pamamagitan ng pagrerebisa at aktuwal na imbestigasyon sa rehiyon kung saan may nakababahalang pagtaas ng claims utilization.

Isa pang proyekto namin ay ang “Oplan Lighthouse.” Ito ay anti-fraud activity na pinangungunahan ng aming Fact Finding Investigation and Enforcement Department (FFIED) sa pakikipag-ugnayan sa mga Legal Services Units ng aming mga rehiyon.

Ang mga pinaghihinalaang Health Care Providers ay mino-monitor at araw-araw na sinisiyasat upang matukoy at mapatunayan kung tama ang mga inire-report nilang mga datos sa PhilHealth, tulad ng bilang ng araw ng confinement ng kanilang mga pasyente.

Mayroon din kaming inilabas naWhistleblowing Policy kung saan ang mga mamamayan ay maaaring mag-ulat, magbigay ng impormasyon o tumestigo sa mga bagay na ilegal, unethical, o paglabag sa tamang prinsipyong pamamahala na kina sasangkutan ng aming mga empleyado, opisyal o maging ng aming mga board of directors.

Upang lalong mapagtibay ang aming adhikaing maiwaksi ang mga tiwaling gawi laban sa korporasyon, kamakailan lamang ay nagtatag ang aming board of directors ng mas mataas na antas ngAnti-Fraud Task Force na siyang mangunguna upang mapigilan ang pagkakaroon at pagkaulit ng mga pandaraya sa National Health Insurance Program.

Ito rin ang magsusuri, mag-aayos at lilikha ng mga proseso, sistema at mga polisiya upang maiwasan ang paulit-ulit na mga gawaing mapanlinlang.

Ang task force ay binubuo ng mga board members na pinamumunuan ng ating Health Care Provider Representative na si Dr. Joan Lareza at lahat ng senior vice president ng korporasyon.

Ang iba pang mga miyembro ng nasabing task force ay mga miyembro ng board na namumuno sa Risk Committee, Audit Committee at Committee on Appealed Administrative Cases.

Sa puntong ito, nais kong linawin na ang PhilHealth ay financially capable sa pagbabayad sa mga ospital, subali’t dapat na naipagkakaloob nila ang de-kalidad na serbisyo sa ating mga miyembro, dahil sa ang mandato ng PhilHealth ay ang mabigyan ng financial risk protection ang lahat ngFilipino, mayaman man o mahirap.

Isa rin ito sa mga pangunahing repormang nais makamtan ng ating kasalukuyang administrasyon – ang mithiing makamit ang “Lahat Para sa Kalusugan Tungo sa Kalusugan Para saLahat” (All for Health, Health For All).

Naniniwala rin kami nakarapat-dapat lamang bigyan ng patas na pangangalaga at proteksyon ang pinakamahihirap na pamilya ng ating lipunan lalong-lalo na sa panahon ng pagkakasakit na nangangailangan ng agarang atensyong medikal.

Naniniwalaang PhilHealth na ang mga healthcare providers ay partner nito sa pagbibigay ng serbisyo sa ating mga miyembro, kung kaya’t ang paglabag sa batas ng iilang tiwaling doktor at institusyon ay nararapat lamang na mabigyan ng karampatang kaparusahan dahil hindi nito papayagang mapagsamantalahan o abusuhin ang pondong nakalaan para sa kaseguruhan ng kalusugan ng mga Filipino.

Kaya’t nananawagan po ako sa inyong lahat na tulungan kami sa pangangasiwa ng ating National Health Insurance Fund.

Kung may mga nalalaman po kayong katiwalian na sangkot ang health care providers o institusyon, doktor, o maging sarili naming kawani, huwag po kayong mag-atubiling tumawag sa aming Action Center sa (02)441-7442 (office hours lamang po) o kaya ay mag-email sa actioncenter@philhealth.gov.ph

Lagi po nating tatandaan na saAlagang PhilHealth, kayo ang Number 1!