Ilang beses na ba natin itong nasasabi kahit hindi pa tapos ang araw? Minsan, pagkagising pa lang ay parang ubos na agad ang ating lakas. Pumasok sa trabaho, humarap sa traffic, mag-asikaso ng pamilya, magtrabaho ulit at pagsapit ng gabi, katawan at isip natin ay parehong pagod.
Pero baka hindi lang trabaho ang dahilan. Ang patuloy na pagkapagod ay maaaring konektado rin sa kulang o hindi maayos na tulog, matinding stress, hindi balanseng pagkain, kakulangan sa physical activity at dehydration. Kaya kahit mahaba ang oras ng tulog, maaari pa ring hindi natin maramdaman na tunay tayong nakapagpahinga.
Malaki rin ang epekto ng ating cellphone at social media. Pagmulat ng mata, hawak na agad ang telepono; bago matulog, nag-i-scroll pa rin. Notifications, emails, balita at iba’t ibang impormasyon ang patuloy na nagpapagana sa ating utak. Minsan, ang katawan natin ay nakahiga na, pero ang isip ay parang nasa trabaho pa rin.
Mahalaga rin ang pagkain. Kapag madalas tayong umaasa sa fast food, matatamis na pagkain at processed food, at kulang naman sa gulay, prutas, protina at iba pang masustansiyang pagkain, maaaring maapektuhan ang ating energy. Kasabay nito, huwag nating kalimutan ang simpleng pag-inom ng sapat na tubig at regular na paggalaw ng katawan.
Hindi kailangang maging atleta para maging active. Ang simpleng paglalakad, stretching at pag-iwas sa matagal na pagkakaupo ay magandang simula. Mas mahalaga ang consistency kaysa sa biglaang matinding exercise na hindi naman natin kayang ipagpatuloy.
At higit sa lahat, kailangan nating matutong magpahinga. Ang pahinga ay hindi katamaran. Hindi rin ito nangangahulugan na mahina tayo. Minsan, ang pinakamatalinong gawin ay huminto sandali, huminga nang malalim at bigyan ang ating katawan at isip ng pagkakataong makabawi.
Kung palagi kang pagod, huwag agad umasa sa kape, energy drinks o supplements para lamang makaraos sa araw. Pakinggan ang iyong katawan. Kung ang pagkapagod ay matagal nang nararanasan, malala, o may kasamang iba pang sintomas, makabubuting kumonsulta sa isang health professional upang malaman kung may pinagbabatayan itong kondisyon.
Sa huli, ang tunay na yaman ay hindi lamang nasusukat sa dami ng pera o ari-arian. Ang katawan at kalusugan ang ating pinakamahalagang “goldmine.” Alagaan natin ito habang may lakas pa tayo. Dahil hindi natin kailangang hintaying maubos ang ating energy bago natin matutunang magpahinga.