Ipinabura ni Atty. Shiela Sison ng defense team sa record ng impeachment court ang pahayag ni private prosecutor Atty. Benjamin “Jay” Tolosa Jr., ang katagang “abogadong walang alam.”
Sa ika-21 araw ng impeachment trial, iniharap ng prosekusyon si Atty. Michael Poa, spokesperson at defense counsel na idineklarang hostile witness dahil bahagi siya ng defense team ni Vice President Sara Duterte.
“The Vice President chose him (Atty. Michael Poa) – the man who knew nothing – to answer the auditors. Sa kabila noon, siya ang inatasan ng bise presidenteng sumagot sa COA (Commission on Audit). Hindi ang SDO (Special Disbursing Officer), hindi ang nag-disburse ng pera, hindi ang tumanggap ng pera, ang abogadong walang alam,” pahayag ni Tolosa.
Hiniling naman ni Sison na tanggalin ang sinabi ni Tolosa na “abogadong walang alam” at iginiit na may karapatan ang testigo laban sa mga walang kinalaman, hindi wasto at nakakainsultong mga tanong.
“I don’t think that to include in the offer a statement that said ‘Ang abogadong walang alam is proper. Whether here or outside the court, whether we are trying an impeachment case or we’re just talking to one another as to fellow members of the Bar,” giit ni Sison.
“And I believe I have to ask this court to strike this off the record,” dagdag pa niya.
Paliwanag naman ni Tolosa, hindi niya intensyong insultuhin si Poa, at ipinaliwanag niya na kaya niya nasabi ang katagang “abogadong walang alam” ay dahil paulit-ulit na sinabi ni Poa sa pagdinig sa Kamara de Representantes noong 2024.
Sa ruling ni Presiding Officer Sen. Francis “Chiz” Escudero, pinatatanggal niya sa record ng impeachment court ang nasabing kataga ni Toloso. Pinaalalahanan din niya ang mga abogado ng dalawang panig na huwag gumamit ng ganoong uri ng salita sa kapwa abogado. (Dindo Matining)
