ANIM na Pilipinong trackster sa pangunguna ni 2-time Southeast Asian Games gold medalist Eric Shawn Cray at baguhang Filipino-Spanish na si John Tolentino Cabang ang susubok mag-uwi ng medalya sa Asian Indoor Athletics Championships ngayong weekend sa Kazakhstan.

Sasabak para sa Pilipinas sina Cray sa 60m, Janry Ubas sa long jump at heptathlon, Sarah Dequinan sa pentathlon, Harry Diones sa triple jump, Leonard Grospe sa high jump at si Cabang.

Kasama din sina coach Dario de Rosas at Patafa secretary general Edward Kho sa delegasyon.

Sina Ubas, Dequinan, Diones at ang mga opisyal ng koponan na umalis ng Maynila noong Martes ng gabi ay bumibiyahe pa rin habang tinatahak nila ang 30 oras na ruta patungo sa Astana.

Ang koponan ng anim na atleta, ang pinakamalaki sa paglahok ng bansa sa continental indoor meet na ito, ay may mabigat na gawain na manalo ng unang medalya. (Lito Oredo)