Una sa Balita

1 ka toneladang Shabu, nakasibat sa Cavite

By
0 156

Naabtan nalang sa mga operatiba sa Philippine Drug Enforcement Agency (PDEA) ug Philippine National Police (PNP) ang upat nga magnetic lifters nga wala nay sulod nga iligal nga drugas sa General Mariano Alvarez (GMA), Cavite.

Sa press briefing, matud ni PDEA Director General Aaron Aquino, ang nakit-ang magnetic lifters sa usa ka warehouse sa Barangay F. Reyes sa GMA niadtong Agosto 9 susama kini sa nasakmit sa Manila International Container Terminal (MICT) niadtong Martes.

Gironda nila ang maong bodega human sila makadawat ug kasayuran gikan sa caretaker kabahin sa lifters nga miabot sa Hunyo apan nakalighot na ang mga sulod niini dihang miabot ang PDEA sa maong dapit.

Sa gihimong imbestigasyon, walay nakita nga nahabiling shabu sa lifters apan nakapanimaho ang K-9 units sa gituhoang shabu.

Matud pa sa ahensiya, ang maong lifters adunay sulod nga usa ka toneladang shabu nga nagkantidad og P6.8 bilyon.

Naguol sila kay nakalighot ang dakong kantidad sa shabu ga mahimong mabaligya kini sa kadalanan.

Base sa inisyal nga impormasyon, gikan ang mga droga sa Taiwan ug China diin gigamit sa mga sindikato ang Malaysia isip trans-shipping point.