Nagpakalat na rin ng emergency at rescue team ang tanggapan ni Senador Manny Villar mula noong Sabado ng madaling-araw para sagipin ang may 1,300 biktima ng pagbaha na dulot ng bagyong Ondoy.

Ang mga biktima ay nasagip mula sa mga lumubog nilang bahay, binahang kalsada at pinagtatrabahuhan at inihatid sa ligtas na lugar ng malalaking truck.

May 26 na malaking truck ang ipinakalat ng tanggapan ni Villar sa Metro Manila hanggang Cainta at Antipolo City mula hapon ng Sabado hanggang kahapon ng umaga. Kahapon ng umaga, lima pang malalaking truck ang ikinalat para iligtas ang mga naistranded sa baha.

Sinisikap din ng rescue teams ni Villar na makakuha ng helicopter at dagdag na mga pump boat para marating ang iba pang mga lugar na apek­tado ng baha.

Gumamit rin kahapon si Villar ng helicopter kasama si Willie Revillame para mamigay ng pagkain sa mga na-trap ng baha sa bubong ng kanilang bahay sa Rizal, Valenzuela, Marikina, Bulacan at Cavite.

Ilan sa mga nasagip na biktima ay dinala sa mga evacuation center sa SM centerpoint, San Beda, UST, Central Colleges of the Philippines at Jose Rizal University.

Sinabi ni Villar na kailangan ding mahatiran ng pagkain at tuyong damit ang mamamayang nais­tranded sa bubungan ng kanilang mga bahay mula pa noong Sabado.