DAVAO CITY --- Binaril at napatay ng dalawang hindi pa nakikila­lang nakamotorsiklong suspek ang isang negosyante at ang misis nito sa labas ng isang pribadong paaralan sa Sinsuat Avenue, Cotabato City kahapon ng umaga.

Sa ulat ng Cotabato City Police, nakilala ang mga biktimang si Noni Luminog at ang misis nitong si Mylene na pinagbabaril at napatay ng mga salarin sa parking area ng Notre Dame School, umaga ng Setyembre 22.

Sa ulat ng pulisya, nakasakay noon sa kanilang Toyota Revo ang mag-asawa at palabas ng paaralan matapos ihatid ang kanilang anak nang lapitan sila ng mga ‘di nakilalang suspek saka pinagbabaril na naging dahilan ng agaran nilang kamatayan.

Matapos ang pamamaril, mabilis ding tumakas sa hindi pa mabatid na direksyon ang mga suspek sakay ng kanilang getaway car.

Patuloy pang nagsasagawa ng imbestigasyon ang pulisya sa insidente sa kasalukuyan.