Hindi nakapalag ang isang vice mayor nang ares­tuhin ito ng pinagsanib na puwersa ng Airport Security-Intelligence and Investigation Branch (ASC-IIB) at ng NCR-Police Center for Aviation Security (PCAS) matapos mahulihan ng labing-tatlong sticks na pinatuyong dahon ng marijuana sa South Wing departure ng Ninoy Aquino International Airport (NAIA) Terminal 2 kahapon ng madaling-araw. 

Ang suspek ay si Je­remy Guiab y Galuteria, 40, bise-alkalde ng ba­yan ng Wao, Lanao del Sur, pasahero ng Philippine Airlines flight PR 819 na patungong Davao City na paalis sana ng alas-4:05 ng madaling-araw.

Sa report, idinaan ni Guiab sa may Final Security Screening Checkpoint ang ilan sa kanyang mga hand-carry bag upang idaan sa X-ray machine kung saan ipi­natutupad ito ng pamunuan ng Manila Internatio­nal Airport Authority (MIAA) sa tuwing pumapasok na sa final check ang isang pasahero.

Hindi naman nakaligtas sa mga awtoridad si Guiab makaraan siyang kapkapan ng isang Nazario Malonzo, on-duty frisker ng Security Screening Office, kung saan dito nadiskubre sa kaliwang bulsa ng panta­lon ang 13 pirasong pinatu­yong dahon ng marijuana.

Agad ipinagbigay-alam ni Malonzo sa superior nitong si PO2 Arlene Albores, na kasalukuyang on-duty supervisor, ang mga nakumpiskang droga sa pag-iingat ni Guiab kaya agad inimbitahan ng mga awtoridad sa kanilang tanggapan ang nasabing bise-alkalde.

Samantala, pagkatapos makuhanan ng ilang impormasyon ang nasabing opisyal ng Wao, Lanao del Sur, agad siyang itinurn-over nina P/Supt. Roberto Bernal at Capt. Froilan Sanchez sa tanggapan ni P/Insp. Al Abner Wahad Santos, hepe ng PNP NCR-PCAS, para sampahan ng kaso.