Tahasang sinabi kahapon ng Malacañang na hindi untouchable si Depu­ty National Security Adviser Luis ‘Chavit’ Singson taliwas sa mga insinuwasyon hinggil sa kinasasangkutan nitong kaso ng pananakit sa isang kinakasamang babae.

Binigyan-diin ni depu­ty presidential spokesman Anthony Golez na walang katotohanan ang mga paratang na “hindi magalaw” ng palasyo si Singson dahil sa laki ng utang na loob dito ni Pa­ngulong Gloria Macapagal-Arroyo sa dating Ilocos Sur governor.

Matatandaang si Singson ang tumayong ‘key witness’ laban sa kaibi­gang si noo’y Pangulong Joseph Estrada sa kasong pandarambong na nag-ugat sa pagkakamal ng yaman mula sa kita sa jueteng na isang uri ng illegal gambling sa bansa.

Gayunpaman, nilinaw din ni Golez na hindi kailangang patawan ng preventive suspension si Singson habang dinidinig ang kasong isinampa rito ng common-law wife na si Rachel ‘Che’ Tiongson.

Sa halip ay ipinaubaya na lamang ng Malacañang sa immediate superio­r ni Singson, na si Nationa­l Security Adviser Norberto Gonzales, ang pagpapasya.

Hindi rin kumbinsido ang palasyo na maiimpluwensyahan ni Singson ang independenteng imbestigasyon ng Philippine National Police (PNP) kahit pa aktibo itong gumaganap sa kanyang tungkulin kaya’t walang makitang rason ang palasyo para isuspende o pagbakasyunin ito.

Sa panig naman ni Gonzales, sinabi nitong ipapatawag muna niya si Singson upang kunin ang kanyang bersyon sa reklamo ni Tiongson bago siya gumawa ng kinakailangang hakbang.

Ngunit sa panig ng kababaihan, nagkakaisa ang tinig ng mga ito para ipakulong si Singson.

“Kung ako ang tatanungin, dapat makulong siya para magsilbing lesson sa kanya pati na sa mga kalalakihang abusado sa kanilang mga partners,” ani Gabriela partylist Rep. Luzviminda Ilagan.

Kaugnay nito, tinitiyak naman ng isa pang kinatawan ng Gabriela, si Rep. Liza Maza, na hindi nila isusuko ang laban ni Tiongson at handa nila itong suportahan hanggang sa pagkakamit ng hustisya.

Hindi man itinanggi ni Singson ang pananakit sa ka-live in ay pinangatwiranan nito ang nagawa sa pagsasabing nahuli niya ang babae na may kasamang lalaki sa kanilang apartment.