Ipinahiya ng World Bank si Pangulong Gloria Macapagal-Arroyo
nang itatwa nito ang pahayag ng huli kamakalawa na magkakaloob ang
nasabing financial institution ng $10 bilyon na standby facility/fund
para sa mga bansang miyembro ng Association of Southeast Asian Nations
(ASEAN) na lulumpuhin ng krisis na dulot ng economic slowdown sa
Estados Unidos.
Base sa report, sinabi ni WB East Asia and Pacific regional
Vice-President Jim Adams na bagama’t handa silang tumulong
sa Asean kung saan miyembro ang Pilipinas, hindi umano
ito eksklusibo para lamang sa nasabing rehiyon kundi para sa anumang
bansa na kakailanganin ito.
Bilang reaksyon, sinabi ni Department of Trade and Industry (DTI)
Sec. Peter Favila sa panayam sa Malacañang na si Finance
Sec. Margarito Teves ang source ng balita at nag-ulat kay Pangulong
Arroyo hinggil sa standby fund ng WB sa Asean dahil nasa Washington
ito at nakikipag-usap sa mga WB at International Monetary Fund
(IMF) officials.
Nagkataon umanong dalawang beses nakipagpulong si Teves sa
WB officials at naging pabagu-bago ang posisyon ng huli at posibleng
doon nagkaroon ng kalituhan, pagtatanggol ni Favila sa kalihim.
Ngunit bago matapos ang araw kahapon ay isang bagong pagtutuwid
ang ginawa ni Teves sa isang telephone interview. Inamin nitong
nagkamali siya ng pagbibigay ng impormasyon sa Pangulo dahil hindi
ang WB kundi ang IMF ang nangako at naglaan ng $10 bilyong
standby fund bilang ayuda sa matatamaang ASEAN countries ng namiminsalang
krisis pinansyal sa buong mundo.
Ayon sa kalihim, nadiskubre umano niya ang pagkakamaling ito nang
rebyuhin niya ang kanyang notes.
|
