Nagsimula nang magpanik ang mga kababayang domestic helpers (DHs) sa iba’t ibang panig ng mundo. Ang dahilan: sapul ng pagsemplang ng ekonomiya ang kanilang mga amo at isa sa opsyon ng mga ito ay pauwiin na sila (DHs) sa Pilipinas kahit hindi pa tapos ang kanilang kontrata.

Isa si Cristy Arciaga, 46-anyos na DH sa Singapore, sa nahahawa sa tens­yon ng kanyang negos­yanteng amo.

“My employer would turn on the television every morning to check the latest stock market report even before breakfast. He is often angry and tells me he might send me home before my contract ends,” kwento ni Arciaga sa Agence France Presses (AFP).

Hindi na umano siya mapagkatulog sa kaiisip sa paulit-ulit pahayag na ito ng iritado niyang amo. “What about my family? Two of my children are still in college,” pag-aalala ng Pinay maid.

Ngunit hindi lang si Arciaga ang may ganitong alalahanin. Libu-libong mang­gagawang Pinoy -- DHs, restaurant staff at mga obrero -- na nakakalat ngayon sa mayayamang lungsod sa Asya ang natatakot na mapasama sila sa nakaumang na ‘mass layoff’ na huling paraan ng pinapasukan nilang mga kumpanya at amo para makatawid sa global financial tsunami.

Ang pinakamalaking problema ng mga overseas Filipino workers (OFWs) na ito ay ang magugutom nilang pamilya oras na matigil ang pagpapadala nila ng remittances na resulta ng pagkatanggal sa trabaho.

“In times of economic slump, the first thing that governments do is crack down on undocumen­ted workers because they are seen as a burden to the economy and a problem to society,” ayon naman kay William Gois, regional coordinator ng Migrant Forum in Asia.

Sa pinakahuling survey ng Social Weather Station (SWS), nakumpirmang nararamdaman na ng mga pamilyang Pinoy ang epek­to ng global crisis.
Kahapon ay ipininta na rin ni Sen. Mar Roxas ang napakasamang senaryo sa hinaharap ng milyong OFWs bunga ng nangyaya­ring pagbabawas ng mga empleyado sa iba’t ibang panig ng mundo.

“Napakalaki ng epek­to nito sa atin sa dara­ting na buwan. Pero may magagawa ang gobyerno para maiwasan ito. Kailangang kumilos agad,” diin ni Roxas.