IKamatayan ang sina­pit ng lalakeng huma­bol sa dalawang kelot na nanghablot ng portable play station ng kanyang kaibigan matapos itong tarakan sa dibdib kamakalawa ng gabi sa Antipolo City.

Sa ulat ng pulisya ang nasawi ay nakilalang si Mar Jerard Reguinto, 20-anyos, binata, ng Everlast Compound, La Colina Subd., Bgy. Mambugan,

Antipolo City kung saan ang isa sa dalawang suspek na naaresto ay pinangalanang Jose, 17-anyos ng Purok Maligaya, Bgy. Mambugan, Anti­polo City.

Lumalabas sa pagsisi­yasat ni PO1 Nythan Hung na ang insidente ay naganap dakong alas-10:40 kama­kalawa ng gabi habang ang biktima ay nakikipagkuwentuhan sa kaibigang si Yvette Urgelles, 20, dalaga ng Teremil Subd., Bgy. Mambugan.

Nasa harap ng bahay ang biktima nang bigla na lamang hinablot ng dalawang kalalakihan ang hawak na portable play station ng dalaga.
Mabilis na nagtatakbo ang mga suspek su­balit humabol ang biktima upang mabawi ang PSP ngunit bigla na lamang itong dinaluhong ng saksak sa dibdib.

Dahil napuruhan sa dibdib, natuluyang masawi ang biktima habang matagumpay namang nasukol ng mga operatiba ang isa sa suspek sa isina­gawang follow-up operation.