Itinanggi ng hepe ng Legislative Budget Research Monitoring Office (LBRMO) na nagkaroon ng P200 milyong double insertion sa C-5 road extension project na agad sinegundahan ni Senate President Juan Ponce Enrile.

Sa pagpapatuloy ng adjudicatory hearing ng senate committee of the whole hinggil sa conflict of interest case laban kay Sen. Manny Villar, nilinaw ni Atty. Yolanda Doblon, director-general ng LBRMO, na hindi nagkaroon ng double insertion sa C-5 road project kundi dinagdagan lamang ang orihinal na P200 milyon na alokasyon sa proyekto noong 2008.

“We don’t consider it as a double entry but an addition,” pagdidiin ni Doblon.

Ibinigay ng budget officer ng Senado ang deklaras­yong ito matapos kulitin ni Atty. Ernesto Francisco, abogado ng complainant na si Sen. Jamby Madrigal, na sinadya ni Villar na ihiwalay ang appropriation ng P200 milyon sa C-5 road project upang magkaroon ng dobleng budget dito.

Ang posisyon ni Doblon ay sinuportahan naman ni Enrile na noong panahong ginawa ang pagsingit ng karagdagang P200 mil­yon sa C-5 road project ay siyang chairman ng Senate committee on finance.

“This corrects the impression that there is a double insertion, there was only one insertion of amendment,” paliwanag ni Enrile.

Mistula namang sumang-ayon din si Sen. Panfilo Lacson sa pana­naw nina Doblon at Enrile, su­balit nagpahayag pa rin ito ng pagdududa sa intensyon ni Villar.

“It may not be a double insertion, I agree with the chair, but it is obviously a redundant appropriation,” giit pa ni Lacson.

Hindi naman bilib si Sen. Mar Roxas sa naging testimonya ni Doblon lalo pa’t tila pinoprotektahan nito si Villar.

“Hindi naman po kayo bulag, hindi naman po kayo mahina, alam naman ninyo ang kalakaran. Ang punto ko lang dito ay magpakatotoo tayo,” bulalas ni Roxas.