|
Nananatili pa ring
walang bahid ng talo si RP International Master at No.14 seed Wesley
So nang lagpasan si No. 37 Krzysztof Bulski ng Poland para sa
kanyang ikalawang sunod na panalo at makisosyo sa liderato kasama
ang 11 iba pa matapos ang second round ng 2007 World Juniors and
Girls Chess Championships sa T. Petrosian Chess House sa Yerevan,
Armenia noong Huwebes.
Sunod na makakatapat
ni So si No. 63 Tigran Mamikonian ng Armenia, na galing mula sa
upset wins kontra No.20 IM Sebastian Feller ng France.
Kasama sa mga
woodpushers na may 2.0 points sina top seed GM Wang Hao ng China,
No.3 GM Maxim Rodshtein ng Israel, No.5 Gawain C.B. Jones ng
England, No. 12 GM Arman Pashikiran ng Armenia, No.15 GM David
Howell ng England, No. 16 IM Narayanan Gopal ng India, No.17 IM
Evgeny Romanov ng Russia, No. 18 GM Parimarjan Negi ng India, No.24
IM Gogineni Rohit ng India, at No. 31 IM Sasha Kaplan ng Israel.
Samantala, nakabalik
naman sa kontensyon si Pinay Woman National Master Aices Salvador
nang patiklupin niya si Ghazal Hakimifard ng Iran sa distaff side.
Ang solo champion, sa
boy’s and girl’s 20 and under division ay mapagkakalooban ng
outright grandmaster (GM) at woman grandmaster (WGM) title, ayon sa
pagkakasunod. |