|
Todas ang 53-anyos
konsehal ng bayan ng Bucay, Abra habang kritikal sa pagamutan ang
kasama nito makaraang ambusin ng mga naka-bonnet na suspek kahapon
ng umaga.
Kinilala ni Police
Regional Office-Cordillera Director, P/Chief Supt. Eugene Martin,
ang nilikidang si Juanito Zales y Alzate, may-asawa, SB member ng
Bucay ay namatay noon din. Patuloy namang isinasalba sa Abra
Provincial Hospital ang kasama nitong si Rex Bringas y Quintos na
nahagip ng bala ng mga hinihinalang hired killers na mabilis ding
nakatakas.
Ayon kay Martin,
bandang alas-9:30 kahapon ng umaga nang abangan ng mga suspek ang
biktima na noo’y lulan ng black Isuzu pick up sa may
Bucay-Penarrubia Road, Sitio Dispensary, Bgy. Siblong, Bucay.
Hinihinala namang paghihiganti ang
motibo sa pamamaslang kaugnay ng mga kasong murder kay Florianne
Bernardes y Javier, acting clerk of court ng RTC Branch 58, Bucay;
Eduardo Gonzales, Bgy. Chairman ng Bgy. Laytugan, Bucay; at Eddie
Tadeo, Bgy chairman ng Bgy. Pagala, Bucay. |