|
Matapos ang ginawang
sunud-sunod na pagtataray ni Senadora Miriam Defensor Santiago,
si Senador Juan Ponce Enrile naman ang gumawa ng eksena kahapon
matapos na sitahin ang isang estudyante ng La Salle na basta na
lamang kumuha ng litrato habang isinasagawa ang ‘budget hearing’
ng Commission on Human Rights.
Halos mamutla at
mangiyak-ngiyak si Mark Jinel Galez, Masscom student ng La Salle-Dasmariñas
nang duruin umano ni Enrile at sitahin dahil sa ginagawa nitong
pagkukuha ng larawan.
"Why are you
taking picture? Who are you?" pag-uusisa ng senador.
Kasabay nito, agad na
ipinag-utos ni Enrile ang pagpapalabas sa estudyante dahil sa hindi
naman daw siya guwapo para kunan pa ng litrato.
Dahil dito,
lulugu-lugong lumabas si Galez ng C.M. Recto at J.P. Laurel Room
kung saan ginaganap ang budget hearing.
Matapos ang pagdinig,
nilapitan pa ni Enrile ang mga kaklase ni Galez at tinanong kung
kasama nito ang napahiyang estudyante. Ayon pa sa senador, kapag may
nangyari umanong masama sa kanya dahil sa pagkuha ng litrato,
mananagot ang pobreng Lasalista.
Sa halos araw-araw na
transaksiyon sa Mataas na Kapulungan ng Kongreso, pangkaraniwan na
ang pagdalaw ng iba’t ibang sektor ng lipunan, partikular na ang
mga kabataang estudyante upang malaman kung anu-anong trabaho ang
ginagawa sa Senado.
Kalimitan din, ang
pagkuha ng larawan ng mga miron ay pangkaraniwan lamang kaya’t
nagulat na lamang ang lahat nang magalit si Enrile sa naturang
estudyante dahil lamang sa pagkuha nito ng litrato.
Kamakalawa lamang ay nag-init ang ulo
ni Sen. Santiago matapos na tumunog ang cellphone ng isang staff ng
senadora. Bagama’t hindi nalaman ni Santiago kung sino ang may-ari
ng tumunog na cellphone, inatasan nito ang legislative pages at
security personnel na arestuhin ang taong hindi nag-off ng cellphone
sa kanyang hearing. |