|
Sa gitna ng pag-init
ng pailalim na aksyong patalsikin si House Speaker Jose De Venecia
Jr. bilang lider ng Kamara, nahiling naman ng Simbahang Katoliko na
panahon na para ikonsidera ng huli ang pag-alis sa naturang posisyon.
Ayon sa ‘unsolicited advice’
ni Lipa Archbishop Ramon Arguelles, matagal na rin namang hawak ni
De Venecia ang Speakership ng Mababang Kapulungan ng Kongreso kaya’t
panahon na para bigyan naman nito ng tsansa ang iba para pamunuan
ito.
"Matagal na nga
siya (De Venecia) d’yan. Hindi naman dapat (patalsikin) pero
bigyan naman ng chance ‘yung iba. Marami din namang capable e, so
pagbigyan naman ‘yung iba," ani Arguelles.
Sa pananaw naman ni
Lingayen-Dagupan Archbishop Oscar Cruz, masyado na umanong maraming
nalalamang ‘baho’ ng gobyernong Arroyo si De Venecia kaya’t
kung sakaling magkaroon ng ‘showdown’ sa pagitan ng Speaker at
ni First Gentleman Mike Arroyo na idinadawit ng anak ni De Venecia
sa broadband scandal ay si Pangulong Gloria Macapagal-Arroyo umano
ang madadale.
Hinggil sa ugong na
gumagalaw na ang puwersang magpapatalsik kay De Venecia sa trono ng
Kamara, dedma ang mga kasapi ng majority bloc dito.
"Frankly,
honestly and candidly and truthfully, I never heard of any. And
nobody asked me or mentioned to me or suggested to me to change the
Speaker. I have read a lot in newspaper. We never heard of any
movement," ani House majority leader Arthur Defensor.
Sa kanyang pagkaalam
ay taglay pa rin ni De Venecia ang suporta ng nakakaraming
kongresista. Isang patunay umano nito ay ang pagkakalagay sa ‘back
burner’ ng reklamong inihain laban sa Speaker sa ethics committee
kaugnay ng pakikilahok ng anak nito sa bidding ng isang government
project.
|