MIKE A.: NO WAY!

Nina ROSE MIRANDA, IRISH ANN CRUZ, TINA MENDOZA at ERALYN PRADO

Sa phone interview kina chief presidential legal counsel Sergio Apostol at chief of staff ni G. Arroyo na si Undersec. Juris Soliman, wala na umanong dahilan upang dumalo pa sa Senado ang Unang Ginoo dahil hindi ito direktang inakusahan sa nilagdaang sworn statement/affidavit ng negosyanteng si Jose ‘Joey’ De Venecia III hinggil sa kontrobersyal na kontrata at hindi rin idinawit ni acting Commission on Higher Education (CHED) Chairman Romulo Neri sa isang sworn affidavit.

Katwiran din ng dalawa, wala namang sasabihing anuman ang Unang Ginoo dahil pinasinungalingang na nito ang bintang na nakialam sa negosasyon para sa ZTE contract.

Nangangamba rin sina Soliman at Apostol na magkaroon ng masamang epekto sa kalusugan ng presidential spouse ang pagdalo sa Senado lalo na’t kasalukuyan pa lamang itong nagpapagaling simula nang sumailalim sa open-heart operation noong Abril.

Sa panig naman ni Atty. Ruy Rondain, isa sa abogado ng Unang Ginoo, sinabi nito na hindi pa nila ganap na ibinabasura ang pagdalo sa pagdinig ngunit tulad ng dalawa ay naniniwala rin ito na wala na itong silbi pa dahil nalinis na ang pangalan ng First Gentleman.

"His name is clear, he made the proper explanation already. He already said the truth," ani Rondain.

Dahil dito ay nakatakda umanong konsultahin ng kampo ni G. Arroyo ang mga abogado at doktor nito sakaling dumating na ang imbitasyon ng Senado.

Hiniling pa ng mga ito na sana ay maging "considerate" at sensitibo ang mga senador sa kondisyon ng Unang Ginoo ngunit iginiit na hindi umano nababahala ang huli sa panibagong kontrobersyang kinakaharap.

Ngunit sa panig ng Simbahang Katoliko, sinabi ni Lingayen-Dagupan Archbishop Oscar Cruz na higit umanong makakabuti para kay G. Arroyo kung haharapin nito sa isang pormal na imbestigasyon si De Venecia, kinatawan ng natalong bidder na Amsterdam Holdings Inc. (AHI). "If he (Arroyo) can, he should attend it (Senate hearing) so he could answer the accusations of Joey De Venecia. It will not look good if he will remain quiet," anang obispo.

Ito rin ang paninindigan ng mga militanteng grupong Anakpawis at Kilusang Mayo Uno (KMU) na nagbalandra ng higanteng subpoena sa harap ng LTA Bldg. sa Perea St., Makati City na pag-aari ng Unang Ginoo upang igiit na hindi dapat balewalain ang naturang summon.

"The First Gentleman should let the truth come out. He should appear before the Senate and even the people just to show that he has nothing to hide as he keep on insisting. The people deserves nothing less than the truth," ani Randy Evangelista ng Anakpawis.

Samantala, mismong ang presidential adviser on economic affairs ni Pangulong Gloria Macapagal-Arroyo na si Albay Gov. Joey Salceda ang nagrekomenda kahapon na mahalagang magkaroon ng maayos na ‘closure’ sa Senate investigation patungkol sa ZTE deal.

Ayon sa opisyal, kung siya umano ang tatanungin ay nais niyang magkaroon ng ‘final report’ ang Senado sa isyu upang malaman ang katotohanan kung nagkaroon talaga o hindi ng iregularidad sa kinanselang kontrata.

Tinutulan din nito ang anumang pagtatangka na muling buhayin ang proyekto para ibigay sa bagong kontratista.

Kahapon ay iginiit din ni Anakpawis partylist Rep. Crispin Beltran na hindi dapat magkawatak-watak ang mga senador ngayon laban sa maanomalyang kontrata, bagkus ay marapat umanong muling magkaisa ang mga senador upang ipagpatuloy ang nasimulang pagsisiyasat sa kontrobersya.

<BACK