Nagpatupad na rin ka­ninang hatinggabi ng P5 kada litrong rollback sa presyo ng kanilang gasolina habang P2 kada litro sa presyo ng diesel ang tatlong higanteng oil companies.

Ang Shell at Petron ay unang nagpahayag na kanilang ipinatupad na rollback na epekibo kaninang hatinggabi. Agad namang sumunod dito ang Chevron, dating Caltex.

Kasunod ito ng bigtime rollback na ipinatupad noong Miyerkules ng isang independent oil firm na Unioil.

Halagang P6 kada litro ang ibinawas ng Unioil sa presyo ng kanilang gasolina habang P4 kada litro naman sa diesel.

Sinundan naman ito ng Eastern Petroleum na nagpatupad ng P1 kada litrong rollback sa presyo ng kanilang diesel habang P3 naman kada litro sa pre­s­yo ng gasolina na naging epektibo kahapon ng tanghali.

Dulot na rin ito ng pa­tuloy na pagbagsak ng pres­yo ng krudo sa world market.

Bagama’t ikinatuwa ng maraming motorista ang tila pagkakaobliga ng ‘Big 3’ na sumunod sa ‘bigtime’ rollback ng Unioil at iba pang new oil players, hindi pa rin kuntento rito ang Pasang Masda.

Ayon sa pangulo nitong si Obet Martin, kulang pa rin umano ng P4 sa presyo ng diesel ang ibinaba ng ‘Big 3’.

Sa tinatakbo umano ng mga naglalakihang tapyas-presyo ay tila mas napapaboran pa ang mga pribadong sasakyan kaysa mass transport o public utility vehicles (PUVs) dahil pating-tingi pa rin ang tollback sa diesel na siya nilang gamit.