RELUCTANT actor ang tawag namin kay Dr. Hayden Kho dahil maru­nong siyang umarte, pero wala sa showbiz ang kanyang focus.

Nakausap namin si Hayden nang makasabay namin sila ni Dra. Vicki Belo sa aming flight sa Los Angeles noong Lunes.

Sinabi ni Hayden na nag-enjoy siya sa kanyang guesting noon sa Bubble Gang, pero kung mabibigyan ng pagkakataon, gusto niya na mag-concentrate sa drama. Naghihintay raw siya na magkaroon ng regular show sa GMA 7.

Ipinaalaala namin kay Hayden na mahirap na mabigyan siya ng regular show dahil madalas ang pagpunta niya sa ibang bansa.

May mga TV guesting na tinanggihan ang kanyang manager na si Lolit Solis dahil palaging wala sa Pilipinas si Hayden.

Pumunta sa LA sina Hayden at Dra. Belo noong Lunes para panoorin ang concert ng Coldplay sa Anaheim, California.

Two weeks silang wala sa Pilipinas dahil hihintayin at panonoorin pa nila ang laban nina Manny Pacquiao at Oscar Dela Hoya sa Las Vegas sa December 5, 2008.

Leading man material si Hayden, pero magiging ganap lamang ang kanyang pagiging aktor kung seseryosohin niya ang pag-aartista.

***

Isinulat ni Ricky Lo sa kanyang column noong Lunes ang balita na ikinasal sa Los Angeles si Raymond Bagatsing at ang entertainment writer na si Cora Pastrana.

Hindi namin kilala ang babae na pinakasalan ni Raymond, pero may nagsabi sa amin na malaki ang agwat ng kanilang mga edad.

Diumano, may ibang dahilan ang pagpapakasal ni Raymond sa LA based lady writer. Susubukan namin na hanapin sina Raymond at Cora para makapagkuwento sila tungkol sa kanilang love story.

***

Kuntento na si Princess Punzalan sa kanyang pamumuhay sa New York.

Nagtatrabaho si Princess bilang bank teller sa umaga at nag-aaral siya sa gabi.

Happily-married na ang aktres sa kanyang Ameri­can husband. Inalok si Princess na lumabas sa isang stageplay na itatanghal sa California.

Gustong-gusto ni Princess na umarte sa stage pero may conflict ito sa kanyang busy sche­dule.

***

Maliban sa P5,000 cellphone load na pwedeng mapanalunan araw-araw, puwedeng manalo ang mga texter ng P5,000 cash prize sa pagsali sa Kalog, Ka-load Plus! ng TV5.

Simula sa December 15, 2008, tatawagan ng isang TV5 host ang masuwerteng subscriber ng Kalog, Ka-load Plus! para tanungin ng isang trivia question. Kapag nasagot ng subscriber ang tanong, magwawagi siya ng P5,000 cash prize.

Para makasali sa Kalog, Ka-load Plus!, mag-register lamang at i-text ang “REG NAME/COMPLETE ADDRESS/BIRTHDATE/GENDER” (e.g. REG Yoanna Garcia/10 Acacia St, Legazpi Village, Makati/Dec1’75/F) at ipadala sa 3456.

Ibibigay sa Kalog, Kaload! winners ang instant load premyo sa kanilang mobile phone via electronic load sa loob ng 24 hanggang 72 hours ng pagkapanalo. Makakatanggap naman ng tawag mula sa network ang mga mapalad na magwawagi ng P5,000 halaga ng load at P5,000 cash.

Abangan ang dalawang (2) winning keywords na bubulaga sa inyong mga TV screen bawat oras, araw-araw sa Kalog, Ka-load! At huwag kalilimutan na mag-register sa Kalog, Ka-load Plus! para manalo ng mas ma­lalaking premyo.

***

Comments are welcome at jojogabinete@yahoo.com.