Lumobo na sa 134 ang kabuuang bilang ng mga mandaragat na Pinoy na kasalukuyang bihag ng mga pirata sa Somalia.

Pito pang Pinoy seamen ang panibagong nadagdag sa listahan ng mga hostage ng mga Somali pirates matapos kumpirmahin kahapon ng Department of Foreign Affairs (DFA) ang pagkaka-hijacked ng mga bandido sa isa pang sasakyang pandagat nitong Martes, Nobyembre 18, ng taong kasalukuyan.

Batay sa ulat mula sa embahada ng Pilipinas sa Nairobi, sinabi ni Crescente Relacion, executive director ng Office of the Undersecretary for Migrant Workers’ Affairs (OUMWA) ng DFA, na kumpirmadong pitong Filipino seamen ang kasama sa 25-man crew ng na-hijacked na Hong Kong-flagged, Iran-operated na MV Delight sa Gulf of Aden.