Inatasan kahapon ng Malacañang ang Philippine National Police (PNP) na palakasin ang ‘intelligence gathering’ laban sa mga robbery syndicate ngayong panahon ng Kapaskuhan bunsod na rin ng tumataas na bilang ng mga robbery-hold up sa Metro Manila.

Nang mausisa dito, sinabi ni Executive Sec. Eduardo Ermita na bagama’t wala silang nakikitang pagkukulang sa hanay ng pulisya, dapat itong ikunsidera bilang “wake-up call” upang pag-ibayuhin pa ang pagmamanman laban sa mga kriminal na inaasahang magsasamantala sa publiko ngayong panahon ng Kapaskuhan.

Giit ng opisyal, dapat na tumutok ang pulisya sa mga istratehikong lugar na madalas na pinangyayarihan ng kriminalidad tulad ng pagnanakaw at pilitin na mapababa kundi man ay ganap na masugpo ang bilang ng robbery-hold up cases.

Aminado si Ermita na hindi maiwasan ang paglipana ng mga kriminal ngayong panahon kung saan nakatanggap na ng Christmas bonus ang mga empleyado ng gobyerno at pribadong sektor.