NANINGKIT sa galit ang mga mata ni Marian, nakita kasing papasok ng simbahan si Mayor Bentolin na isinama pa si Propesora Maniclang.

Walang puwang sa na­pakasagradong okas­yong ito si Mayor Bentolin, giit ni Marian sa isip. Dapat niyang itaboy ito sa seremonya ng libing ng kanyang ama.

Naramdaman pala ng ina ang nais niyang gawin, nakita rin nito sina Mayor Bentolin.

Pero nagpakahinahon ang ina, bumulong agad. “Anak, alalahanin mo ang bilin ng tatay mo -- ang paghihiganti ay para sa Diyos lamang... Huwag kang mag-iskandalo, Marian...”

“Pero, Inay... sobra ho ang galit ko sa demonyong mayor na ‘yan. Natitiyak ko hong siya ang nagpapatay kay Itay...”

“Wala tayong katiba­yan, anak.”

“Para hong puputok sa galit ang sarili ko kapag hindi ko man lang siya nakumpronta, Inay. Pasensiyahan na ho!”

Sabay halos sa pagtatapos ng seremonyas sa simbahan ay sinugod nga ni Marian si Mayor Bentolin.

Galit na galit na kinumpronta ang alkalde ng Delta. “Bakit ka narito, Ma­yor? Tinitiyak mong patay na nga ang tatay ko?”

Namula sa magkahalong galit at pagkapahiya si Mayor Bentolin. “Teacher Marian... naparito ako para makiramay. Ano ba’ng pinagsasasabi mo?”

Si Propesora Manic­lang ay napaurong, hindi rin inaasahan ang kagaspa­ngan ni Marian.

“Ikaw ang nagpapatay sa tatay ko, Mayor Bentolin!” luhaang sigaw ni Marian. “Napakasama mo!”

Lumapit agad ang pari. “Mga kapatid... hindi tamang may sigalot sa taha­nan ng Diyos.”

Namumula pa rin sa galit pero nagpakahinahon si Bentolin. “Father, kayo na nga po ang magsabi kay Teacher Marian... na ako’y deboto na ni Mama Mary. Na ako’y namumuno sa pag­rorosaryo sa aking tanggapan minsan ‘sanlinggo, kasama ang
aking mga department heads...”

Sinegunda­han ito ng sekretaryo ng ma­yor. “Tama po iyon, Teacher Marian. May weekly rosary prayer kami sa munisipyo na si Mayor ang nag­li-lead. Maka-Diyos po kami.”

Ang pari ay lumagay sa gitna. “Deboto na nga ni Mama Mary si Mayor Bentolin, Ma­rian. Gayunma’y hindi ko sinasabing ang bawat deboto ay namumuhay na ayon sa kalooban ng Diyos.

“Ang anumang sigalot ninyo ni Mayor ay sa ibang okasyon at lugar ninyo ida­os, mga kapatid. Naghihintay ng payapang libing ang yumaong si Mang Polding.”

Huminahon pansaman­tala si Marian. Pero ang mayor at si Propesora Ma­niclang ay minabuti nang umalis matapos mag-sign of the cross.

Unwelcome sila ng pamilya ni Mang Polding at ayaw nilang ipilit ang mga sarili. (Itutuloy)