BACOLOD CITY --- Nakatakas si dating double world champion Ronnie Alcano mula sa itinangkang upset ni Noel Caro sa pagtumbok ng 11-9 win at pag-abante sa Last 16 ng First Senate President Manny Villar Cup Bacolod leg kahapon sa Garden Royal Function Hall ng Goldenfields Commercial Complex dito.

Maganda ang naging panimula ni Alcano, hanap ang unang titulo sa naka­lipas na dalawang taon, at agad nakalayo sa 6-2 lead.

Ngunit isang pagkakamali ni Alcano sa 9th rack ang naging pagkakataon ni Caro para makaarangkada ng 4-0 run at naitabla ang laro sa 6-6.

“Ang hirap talaga ng bilyar, kahit anong laki ng lamang mo hindi ka nakakasiguro hangga’t hindi mo napapasok ‘yung huling bola. Isang pagka­kamali mo lang pwede ka pa ring matalo, kaya hangga’t maaari hindi ka magkamali,” ani Alcano.

Nagpalitan pa ng iskor ang dalawang manlalaro sa sumunod na anim na rack ngunit dahil sa mas malalim na experience, nagawang ibulsa ni Alcano ang huling dalawang frame upang makaabante sa susunod na round sa prestihiyosong $37,800 event.

Sunod na makakatapat ni Alcano ang kapwa vete­ran internationalist na si Rodolfo Luat, na hiniya si reigning world no. 1 Dennis Orcollo, 11-7, sa opening round ng four-day competition.

Ginapi ng dating world no. 1 Francisco “Django” Bustamante ang lone female entry na si Rubilen Amit, 11-3; tinalo ni Cebu leg champion Gandy Valle si Alabang leg titlist Warren Kiamco, 11-7; nilagpasan ni Lee Van Corteza si Chinese entry Wang Ming, 11-9; dinurog ni Michael Feliciano si Kenichi Uchigaki ng Japan, 11-7; naka-upset si John Rebong kay veteran Carlo Biado, 11-7; habang pinasuko ni Ronnie Aying si Janno Mazon, 11-6.

Nagawa ring makaalpas ni Bulacan leg winner Ramil Gallego sa katunggaling si Japanese Kenji Taguchi, 11-5, habang parehong iskor din ang naitala ni Joven Bustamante sa duwelo nila ni Elmer Haya.