Isang araw makaraang humarap si dating Department of Agriculture (DA) Undersec. Jocelyn ‘JocJoc’ Bolante, panibagong lista­han ng mga kongresista at local officials na itinuturong nakinabang sa P1.102 bil­yong fertilizer fund ang lumutang sa Senado.

Nakakaladkad naman dito ang 14 na kongresista sa Metro Manila at sinasabing hiwalay pa umano ito sa naunang P728 milyon.

Sa 12-pahinang doku­mentong napasakamay ng Abante, may kabuuang 195 alkalde, 14 Metro Ma­nila congressmen at 48 pang kongresista ang nakalista bilang proponent sa P1.102 bilyong ferti­lizer fund noong 2004 national elections. Ang dokumentong ito ay isinumite kay dating Sen. Ramon Magsaysay Jr., chairman ng committee on agriculture noong 13th Congress at unang nag-im­bestiga sa anomalya.

May kabuuang P188 mil­yong fertilizer fund ang nakalista sa 14 kinatawan ng National Capi­tal Region (NCR) bilang proponent kung saan tig-P3 milyon ang bawat isa, nangunguna si Parañaque Rep. Eduardo Zialcita na naunang umaming tumanggap ng P5 milyon habang itinanggi naman sa hearing kamakalawa ni Sen. Alan Peter Cayetano, noo’y Taguig-Pateros congressman, ang paghingi ng pondo kay Bolante.

Kabilang sa NCR congressman nakalistang proponent ng farm inputs o fertilizer fund ang misis ni Senate President Manuel Villar Jr., na si Las Piñas Rep. Cynthia Villar, anak ni Sen. Rodolfo Biazon na si Muntinlupa Rep. Ruz­zano Biazon, Manila Rep. Ernesto Nieva, Manila Rep. Jaime Lopez, Manila Rep. Rodolfo Bacani, Quezon City Rep. Nanette Castelo Daza, Pa­say City Rep. Consuelo Dy, Makati Rep. Teodoro Locsin Jr., Mandaluyong Rep. Neptali Gonzales Jr., Marikina Rep. Del de Guzman, Valenzuela Rep. Sherwin Gatchalian at Valenzuela Rep. Magtanggol Gunigundo.

Paper trail

Nakatala ang pangalan ng mga proponent sa 2-pahinang dokumentong isinumite ni dating Department of Budget and Management (DBM) Sec. Emilia Boncodin, kinapapalooban ng P1.102 bil­yong halaga ng Special Allotment Release Order (SARO) at memorandum ng Budget and Management Bureau-E (BMB-E) na nasa ilalim din ng naturang departamento.

May petsang Pebrero 11, 2004 ang SARO na inilabas ni Boncodin habang Pebrero 9, 2004 ang me­morandum ng BMB-E kung saan isang nagnga­ngalang Nora Oliveros ang nakapirma sa notice at naka-address kay DBM Undersec. Mario Relampagos.

Sa memorandum na ipi­nadala ni Oliveros kay Relampagos, nilinaw nitong hiwalay ang P1.102 bil­yong Ginintuang Masagang Ani (GMA) fund sa naunang P1.59 bilyong hiningi at ipina-release ni Bolante, alinsunod sa direktiba ni dating Department of Agriculture (DA) Secretary Luis ‘Cito’ Lorenzo.

May 48 pa!

Sa hanay ng 48 pang kongresistang nakalistang proponent ng P1.102 bil­yong farm inputs, dalawa sa mga ito ang nagsisilbi ngayon sa gabinete ni Pa­ngulong Gloria Macapagal-Arroyo. Ito ay sina Department of Budget and Management (DBM) Sec. Rolando Andaya (Camarines Sur congressman noon) at Department of National Defense (DND) Sec. Gilbert Teodoro (ng Tarlac).

Meron din ang mga mayor

Sa kabuuang 195 local officials nakalistang proponent ng P1.102 bilyong fertilizer fund.

Gayunpaman, hindi malinaw sa dokumento kung aktuwal nilang natanggap ang pondo at kung magkano ang kanilang nakuha, ilang linggo bago ang 2004 elections.