Umaabot sa 300 kilo ng double dead na karne ng baboy ang nakumpiska ng mga tauhan ng Office of the City Veterinarian (OCV) sa isang ilegal na katayan kahapon ng madaling-araw sa Pasay City.

Napag-alaman na halos sa likod lamang ng bahay ni Pasay City Mayor Wenceslao “Peewee” Tri­nidad nagaganap ang ilegal na pagkatay ng baboy dahil sa gilid lamang ng kanyang bahay sa P. Villa­nueva St., nakumpiska ng mga tauhan ni OCV chief Dr. Ronaldo Benazor ang mga double dead na karne dakong alas-2:30 ng madaling-araw.

Ayon kay meat inspector Angelito Inocentes, nakatanggap sila ng impormasyon hinggil sa ilegal na pagkatay ng baboy sa bahay ng isang Ricky Mendoza sa naturang lugar na hindi na idinadaan sa pagsusuri kung may sakit o patay na ang kinakatay na baboy.

Nabatid na mara­ming meat vendors sa Pasay Public Market ang direktang kumukuha ng kanilang panindang karne ng baboy sa ilegal na katayan dahil mas malaki ang kamurahan ng halaga nito kumpara sa mga karne ng baboy na dumaan sa inspeksyon at pagsusuri ng OCV bago katayin.

Nakatakas naman si Mendoza at ang kanyang asawa sa pamamagitan ng pagdaan sa bubong ng kanilang bahay nang isagawa ng mga awtoridad ang pagsalakay.

Nagtataka naman ang mga awtoridad kung bakit inihayag ni Barangay Chairman Joseph Saria na hindi niya umano kilala ang mag-asawa gayung nakatira ang mga ito sa nasasakupan niyang barangay.

Ang mga nakumpiskang karne ay dinala sa crocodile farm sa CCP Complex upang ipakain sa mga buwaya.