Nakulimbat ng isa sa dalawang armadong holdaper na magka-angkas sa isang motorsiklo ang mahigit P.5 milyong payroll money, cellphone, credit card at mahahalagang dokumento sa empleyada ng isang kompanya sa mapangahas na panghoholdap kahapon ng tanghali sa Taguig City.

Sa imbestigasyon galing umano sa pagwi-withdraw ng salapi sa isang bangko ang biktimang si Mercy Abareng, empleyada ng Zanpabrik Philippines na nasa Bldg. 5 Sirloina St., FTI Western Bicutan nang harangin ng dalawang suspect sa service road ng Katipunan area sa Western Bicutan dakong alas-11:00 ng tanghali.

Puwersahang kinuha ng mga suspek ang handbag ni Abareng na naglalaman ng salapi at nagmamadaling tumakas subalit nasabat sila ng mga tauhan ng Traffic Management Unit ng Taguig police na pinangu­ngunahan ni SPO3 Ronald Dimaguila.

Matagumpay namang nakatakas ang isa sa mga holdaper tangay ang handbag ng ginang subalit minalas na masakote ang kanyang kasamang si Rodelo Sangrio 38, binata, tubong Quezon province at nakatira sa Dampa, Parañaque City.

Kasalukuyan pang tinutugis ang nakatakas na suspek.